Kortpadkos Aandete in ’n japtrap

Vier vinnige, geurige aandetes.

Tunapasta

Onder R85 • Genoeg vir 4 • Bereidingstyd: 25 minute Gaarmaaktyd: 10 minute

• 1 klein botterskorsie, geskil en ontpit • 1 mediumgroot eiervrug • 15ml olie • sowat 250g linguine • sowat 15ml kerriepasta (of na smaak)

• 1 groot blik (400g) klappermelk • 2 blikke tunastukke, gedreineer • ’n hand vol vars koljanderblare

1 Sny die botterskorsie in blokkies en die eiervrug in skyfies. Pak dit op ’n bakplaat en sprinkel die olie, sout en peper oor. Rooster onder ’n voorverhitte roosterelement tot gaar.

2 Kook die linguine in soutwater tot al dente. Dreineer en hou eenkant.

3 Verhit die kerriepasta in die kastrol waarin die linguine gekook is en roer die klappermelk by. Bring tot kookpunt. Meng nou die linguine, groente en tuna deur en strooi die koljander oor.

Oondgebakte frittata

Onder R90 • Oorgenoeg vir 4 • Bereidingstyd: 25 minute Gaarmaaktyd: 45 minute • Oondtemperatuur: 180°C

• 9 baba-aartappeltjies • 15ml olie • 12 chipolata-varkworsies • 4 klein murgpampoentjies, in skyfies gesny

• 1 klein rooi ui, in dun skyfies gesny • 60 ml gekapte platblaarpietersielie • 4 ekstragroot eiers • 250 ml room

1 Voorverhit die oond. Sny die aartappels in 5 mmskyfies en kook in soutwater tot gaar. Dreineer en geur met sout en peper. Verhit die olie en braai die worsies tot goudbruin en gaar. Skep uit en braai die murgpampoentjieskyfies vlugtig tot geurig. Skep dit dan saam met die aartappels, worsies, rooi ui en pietersielie in ’n vuurvaste oondbak van 20 x 25 cm.

2 Klits die eiers en room saam, geur met sout en peper en giet oor die worsiemengsel. Bak in die oond vir 30 minute of tot goudbruin en deurgaar.

Frikkadelle met spek

Onder R110 • Genoeg vir 4 • Bereidingstyd: 30 minute Gaarmaaktyd: 40 minute • Oondtemperatuur: 180°C

• 600g gemengde bees- en volstruismaalvleis (of gebruik net beesmaalvleis) • 200ml vars broodkrummels • 5ml elk fyn koljander en komyn

• 1 rooi brandrissie, fyngekap • 12 repe spek • 15ml olyfolie • 200g tamaties, gesny • mikro- of gewone basilieblare vir voorsit

1 Voorverhit die oond. Geur die maalvleis rojaal met sout en peper en meng die broodkrummels en speserye deur. Rol met klam hande in 12 ewe groot frikkadelle. Draai ’n reep spek om elkeen.

2 Verhit die olie in ’n oondvaste pan en braai die frikkadelle tot hulle begin kleur kry. Voeg die tamaties by en bak in die oond vir sowat 30 minute of tot gaar en sappig. Strooi die basilie oor en sit voor.

Hoender met broccoli en blomkool

Onder R105 • Genoeg vir 4 • Bereidingstyd: 25 minute Gaarmaaktyd: 25 minute

• 4 hoenderborsfilette • 15ml Dijonmosterd • 10ml olyfolie • 2 knoffelhuisies, fyngekap

• 300 g blomkool- en broccoliblomme • ’n knippie neutmuskaat • 250 ml room • 250 ml jasmynrys

1 Geur die hoender rojaal met sout, peper en die Dijonmosterd. Verhit die olie in die pan en braai die hoender oraloor bruin. Roer die knoffel, blomkool en broccoli by saam met die neutmuskaat. Giet die room oor en laat prut tot die hoender deurgaar en die groente al dente is, en die sous effens ingedamp het.

2 Kook die rys volgens die aanwysings op die pakkie in soutwater tot gaar. Sny die hoender in skyfies en skep saam met die groente en sous op die rys. Sit dadelik voor.

Die frikkadelle is heerlik met rys, kapokaartappels of lekker bros brood.