’n “Skuurhuis” vol welige groenigheid en kosbare hartsgoed
Dié versamelaars kombineer oud en nuut met groenigheid binne en buite.
Toe die Grobbelaars 25 jaar gelede met hul honde hier op die familieplaas buite die Paarl kom nesskop, het hulle in een van die oorspronklike plaasstore ingetrek. Dit beteken darem nie hulle moes tussen die plaasimplemente woon nie – dié struktuur is in die 1960’s reeds in ’n knus en gerieflike drieslaapkamer-blyplek omskep.
In daardie jare was dit mode om verskillende kleure verf deur jou huis te gebruik en die paartjie het gehou van hul mure in enigiets van vlootblou tot lemmetjiegroen. Met verloop van tyd het die kleure meer besadig geword. Later, toe die twee kinders bykom, het die stoorhuis beknop begin voel; dit was tyd vir aanbou. En tipies van ’n bouery op ’n plaas, het die werk maar stadig gevorder omdat die planne gedurig verander het en nuwe idees bygekom het. “Alles het eintlik organies ontwikkel,” verduidelik hulle.
Die bouery, wat in 2010 begin het, het op die ou end drie jaar geduur. In die proses is ’n hele nuwe deel aangebou – in pas met die ou struktuur ook in die styl van die oorspronklike stoor, maar meer modern, met ’n dubbelvolume-leefvertrek en baie natuurlike lig. Daar is ook ’n nuwe hoofslaapkamer en ’n gastekamer, elk met ’n en suite-badkamer. Op die tussenvlak langs die leefkamer is selfs ’n woonstel met sy eie kombuisie.
Vandag is toentertyd se knus skuurhuisie ’n ruim vyfslaapkamerhuis, maar dis steeds onopgesmuk, steeds pure plaas.
Gestroopte versamelings
Wanneer jy die ma van die huis vra oor haar dekorstyl, is haar antwoord tweeledig: Op ’n tyd was dit taamlik eklekties, maar deesdae is dit eenvoudiger. Tog sal die gesin nooit heeltemal gestroop kan leef nie, want hulle is net te sentimenteel en geneig tot “clutter”, skerts sy.
“As jy ’n versamelaar is, kan jy nie help om iets huis toe te bring van elke plek of land waar jy kom nie, al is dit net ’n klippie wat jy op die strand opgetel het. En as jou vriende en familie boonop weet jy versamel dryfhout of plante, dra hulle gedurig geskenkies aan. Hoe kan jy dan iets wat so mooi is en soveel sentiment inhou weggooi?
“Namate ’n mens ouer word, is ’n klippie of ’n stomp wat jy opgetel het baie mooier as iets wat jy in ’n winkel kan koop,” verduidelik sy.
Die gesin het ’n groot liefde vir plante en ou boeke. En as die boeke in ’n stadium te veel raak en daar nie meer pakplek oor is nie, vou hulle origami-ornamente soos Kersversierings van ou bladsye of word dit met behulp van podge ’n mooi kunswerk op hout – ’n baie terapeutiese stokperdjie en ’n lekker manier om die mooi patina van ou papier te bewaar.
Selfs die stukkende rugkant van ’n ou boek word uitgestal – mét die stukkende kant na voor!
Vandag is dit aardse kleure – dié van been, dryfhout en spoelklip – wat die botoon voer in hul skuurhuis. En as dit by kuns kom, is die swart-en-wit werke uit hul studentedae steeds tuis in dié tydlose kleurskema. >>
Liefde vir plante Die ou skuurhuis en die nuwe aanbouing word slim verbind deur ’n gang met glasdeure weerskante wat heeltemal kan oopskuif; die huismense beskryf dit grappenderwys as die “longe” van hul huis. Dit vorm ’n lieflike binnehoftuin. Hier gedy ’n hele verskeidenheid Philodendrons en varings met loof in interessante vorms en skakerings van groen.
Die eienaars het albei grootgeword in gesinne wat na aan die natuur geleef het, en hier in die vrugbare grond van die Paarl kan hulle dié liefde koester. Baie van die plante kom boonop van ’n oupa wat onlangs oorlede is. “Dit gee ons soveel plesier om te sien hoe sy plantjies ná sy dood in ons huis voortleef; dit herinner ons gedurig aan hom,” vertel sy.
Die groenigheid is ook nie beperk tot die glas-gang nie, maar verskaf kleur en tekstuur deur die hele huis. In feitlik elke vertrek word die plante gereeld rondgeskuif sodat elkeen tot sy volle reg kan kom. En elke pot word met sorg gekies sodat dit die plant komplementeer en nie self die aandag steel nie.
[GROENIGHEID BINNE] Maak so met huisplante, sê die Grobbelaars:
• Gebruik plante in elke vertrek in jou huis, mits daar genoeg lig is. Die meeste plante hou van lig, maar nie almal verkies direkte sonlig nie. Sommige kan wel met minder lig klaarkom. • ’n Mens kry nie iets soos “groen vingers” nie – vind soveel moontlik uit oor elke plant, want plante se behoeftes verskil. • Moenie plante kies omdat dit in die mode is nie, maar omdat dit jou passie is. • As jy onseker is oor die regte pot vir jou plant, kies ’n eenvoudige wit pot, want dit pas by enige styl. ’n Kombinasie van kleipotte saam uitgestal op ’n rak werk ook goed. Geweefde mandjies en potplanthouers gee lekker tekstuur, maar moet dit nie oordoen nie. • Niks is so lekker soos om ’n hartseer ou plantjie te red en te sien hoe dit floreer in die regte toestande nie! • Kies plante wat kleintjies maak, want dit is lekker om steggies uit te deel aan vriende wat ook ’n passie vir plante het. • Deesdae kan ’n mens sommer aanlyn plante koop, veral skaars plantsoorte. Kyk gerus op plantify.co.za.
Ons gunsteling-vertrek in die huis is oral waar daar plante is … Vrydae en Saterdae is was- en natmaakdag – dan word elke plant sorgvuldig skoongemaak en water gegee.