Hoe gemaak met die droogte?
Elmien Bussiahn van Kaapstad skryf Dis moeilik om ons spaniels skoon te hou met die waterbeperkings in die Kaap; enige voorstelle?
Cathi Wiehahn, hoofbestuurder by apetslife.co.za, antwoord Al is dit lekker om ons troeteldiere te bad, is dit eintlik onnodig, want hul vel is selfreinigend. Jy hoef hulle eintlik net te bad as daar ’n mediese rede is.
Daar is wel waterlose produkte beskikbaar waarmee jy jou troeteldier veilig kan skoon hou, soos BIO-GROOM Klean Kitty No Rinse- en Waterless Bath No Rinse-sjampoe, asook Pet Patrol Dog Grooming Wipes.
Honde wat gereeld nat word, moet goed afgedroog word. Dit kan tot twee dae neem voor hul pels heeltemal droog is, en kan daarom begin sleg ruik.
Moet nooit jou hond poeier nie (tensy ’n veearts dit voorskryf). Daardie poeier kan die olies op hul vel vaskeer en as dié olies nie ontsnap nie, kan dit ongemak veroorsaak. Jou hond kan hom dan begin krap en sy vel beskadig; dit sal die vel nog olies laat vrystel, wat onwelriekende sere tot gevolg kan hê.
Borsel jou troeteldier gereeld – dit help dat die natuurlike olies eweredig oor die vel versprei, wat die pels opknap en gesond hou. Dié versorging het nie water nodig nie en dis die veiligste en doeltreffendste manier om jou troeteldier se vel en pels in ’n uitstekende toestand te hou. Die meeste troeteldiere geniet dit om geborsel te word omdat dit die band met hul eienaar versterk en versorging natuurlike gedrag is by tropdiere.
Te midde van waterbeperkings is ’n groter punt van kommer jou troeteldier se toegang tot vars water. Omdat hulle nie gryswater kan drink nie, is dit belangrik dat hulle altyd vars, koel drinkwater het. Sorg vir minstens 2–3 waterstasies, almal op koel, skaduryke plekke.
KONTAK apetslife.co.za