Tyd vir Kersinkopies!

30 Nov. – 2 Des.: Besoek die Parkview Charity Christmas Market in Johannesburg vir vermaak en meer as 80 stalletjies. Die opbrengs van die mark gaan aan die Nicarela-welsynsorganisasie (nicarela.org). Skakel 082 610 0650 vir besonderhede. 7: Bring die hele gesin na die Tannery Market in Windhoek, Namibië, vir smullekker snoepgoed en handgemaakte artikels. Om 08:00 kan die fikses ook deelneem aan die Breakfast Run & Walk teen N$20. Skakel +264 (81) 853 8242 of sien tannery.com.na. 12–22: Snuffel deur meer as 150 stalletjies by die Ekliefkrismis Kersmark op George. Besoek ekliefkrismis.co.za of skakel 072 331 4335. 14–16: Die Favourite Things Market op Gabriëlskloof naby Botrivier spog met 45 uitgesoekte stalletjies waar jy als sal kry wat jy dié feestyd nodig het – van gebak tot handgebreide ware en ander skatte. Skakel 028 284 9865 of besoek gabrielskloof.co.za. 14–23: Maak ’n draai by die Parys KersKunsmark in die Vrystaat vir pret en geskenke vir almal! Skakel 082 958 6312 vir besonderhede. 17–19: Ondersteun plaaslike talent by die Locally Yours Market in Port Elizabeth. Soek die mooiste produkte en smullekker happies uit terwyl jy lustig saam met die musikante neurie. Skakel 082 785 4118. 19: Loer in by die Blythedale Coastal Kersmark vir avontuur en puik plaaslike produkte. Baljaar op die glybaan of vierwielfietse, snuffel by die stalletjies of geniet ’n piekniek. Skakel 061 820 3518. Saamgestel deur Suné Esterhuizen Stuur dagboeknuus minstens drie maande vooruit na dagboek@tuis.co.za.