Hemel op aarde
Met die besluit geneem dat hulle nie meer op Stilbaai gaan bou nie, het Serina en Eugene die platteland naby Kaapstad begin ondersoek – van Tulbagh en Riebeek-Kasteel tot strandplekke langs die Weskus.
Op die ou end was dit Onrus se melkhoutbome wat hulle op dié dorp laat besluit het. “Dit is nog ’n ouwêreldse dorpie,” vertel Serina. “Dis boonop net 5 minute se ry van Hermanus af met sy lewendige toeristebedryf. En hier sien jy die mooiste natuurtonele, van walvisse wat kalf tot dolfyne wat saam met die branderplankryers swem.
“Die natuur by Onrusrivier is ook ongelooflik mooi met die pragtige Babilonstoringberg en staproetes, asook ’n seewandelpad tot by Hermanus – regtig ’n stukkie hemel op aarde.”
Ek het ’n ding vir ’n lang tafel. Vir my is ’n tafel die hart van die huis. – Serina