Vars argitektuur
Hoewel Serina bekend is vir haar vintage-handelsware, hou sy van kontemporêre argitektuur. “Ek het nog altyd van ’n huis in die moderne styl gehou, want dis skoon en vars.”
Van buite het die huis ’n strandgevoel, veral danksy die oorvleuelende Nutec-bekleding. Binne is dit skoon en oop, met ligte grys-groen mure en ’n enkele rou baksteenmuur, afgewerk met wit sement, vir ’n bietjie tekstuur.
Soos Eugene en Serina dit wou hê, is die leefareas en hoofslaapkamer op die boonste vlak. Onder is twee slaapkamers, elk met ’n en suite-badkamer en aparte ingang en stoepie.
“Huisbou is nie maklik nie,” sê dié bedrywige entrepreneur. “’n Mens moet regtig heeltyd betrokke wees by die projek, anders loop dinge skeef, wat groot finansiële implikasies het. Op ons ouderdom kry jy ook nie sommer ’n verband nie en ons moes kontant bou – dit kan nogal senutergend raak en was deurentyd maar ’n geloofsaak!”
Serina en Eugene het daarom die finale afronding van die huis self aangepak, met die hulp van subkontrakteurs. Hulle het Chico Shumane, ’n kontrakteur met wie hulle al voorheen saamgewerk het, uit die Kaap laat kom met sy eie span verwers en teëlaars. “Dit was die beste besluit wat ons kon neem,” verduidelik Serina, “want ek glo dat ’n goeie verwer weet waar probleme kan ontstaan en daarom met die regte voorbereiding en goeie produkte ’n groot verskil kan maak aan die afwerking. Saam met die regte vloerbedekking rond dit ’n ruimte af.”
Enige vintage-stuk moet funksioneel, tydloos én mooi wees. – Serina