Roomyskranse met ingelegde perskes

Ons is nie eintlik groot nagereg-eters nie, buiten tradisionele lekkertes soos Jan Ellisen malvapoeding. Ek is ook baie lief vir ingelegde perskes soos my ma, Ellen, dit gemaak het, met Ideal Milk of roomys (of albei, soos hier). Genoeg vir 12 klein vormpies Bereidingstyd: 20 minute, plus vriestyd Gaarmaaktyd: 15 minute

• 60ml suiker • 125ml water • 2 liter roomys, effens sag • 125ml Ideal Milk (behou die res van die blik vir voorsit) • 1 fles ingelegde perskehelftes • meringue-skuimpies • gemmerbroodkoekies (opsioneel)

1 Spuit die holtes van 12 silikoonkransvormpies met kleefwerende sproei. Los die suiker in die water op en bring tot kookpunt. Laat kook sonder om te roer totdat dit die kleur van heuning kry. Haal van die hitte af en giet die karamelstroop op ’n vel bakpapier op ’n bakplaat uit en laat dit hard word.

2 Breek dan die harde karamel in splinters en strooi die helfte onderin die vormpies. Meng die res van die splinters met die roomys en Ideal Milk en skep in die vorms. Sit in die vrieskas tot hard.

3 Om voor te sit, pak die uitgedopte roomyskranse, goue perskes, skuimpies en koekies op aparte dienborde sodat gaste hulself kan help (of skep dit klaar saam in bakkies) en sit die oorblywende Ideal Milk in ’n bekertjie by vir skink – die perfekte somerpoeding!