... en rose net waar jy kyk!
Adele plant haar rose met kleur en geur as riglyn. Hier is haar gunstelinge: • Antico Moderno-rose in pastelkleure, soos ‘Dermalogica Passion’, ‘Una van der Spuy’, ‘Lyn Keppler’ en ‘Roberto Capucci’. Ek hou baie van dié tipe roos, omdat dit soos ouwêreldse rose lyk, maar die eienskappe van moderne rose het. Hulle blom herhalend deur die seisoen en die meeste ruik heerlik! Saam met dié rose plant ek graag artisjokke en pastelkleurige irisse wat die rose se kleure komplementeer. • ‘Otto de Jager’ is ’n pragtige kersierooi roos wat net aanhou en aanhou blom. Daar is soms tot twintig rose aan een plant, met blomkoppe so groot soos pierings. • My mees geliefde rooi roos is ‘Mister Lincoln’. Dit het pragtige groot, geurige blomme in ’n ongelooflike kleur. Dié roos kombineer ek met donkerpers irisse en blou agapante. • In die beddings by ons slaapkamers het ek net lekkerruik-rose. Ek het ‘People’s Princess’, ‘Porcelain’, ‘Memoire’, ‘New Zealand’ en ‘Graaf-Reinet’ – drie van elk – in dié beddings geplant. Terwyl die son ondergaan, is dié rose op hul geurigste! • Rose met meer as een kleur in die blom is ook vir my mooi. Ek het onder meer ‘Rosa Roedean’, ’n pienk roos met wit strepe; ‘Candy Stripe’, met donker- en ligpienk strepe, en die pers ‘Burning Sky’ met helderpienk op die rand van die blomblare. • Oor roosboë in een deel van die tuin word ‘Salmon Panarosa’ en ‘Edgar Degas’ afgewissel. Elders versier rooi rankers soos ‘Archbishop Desmond Tutu’, ‘Don Juan’ en ‘Crimson Glory’ ’n volgende stel boë wat jou na die vormsnoeituin lei. • Ander gunstelinge is ‘Rosemary Ladlau’, ‘Rina Hugo’, ‘Garden Queen’, ‘Oklahoma’ en ‘Double Delight’. >>