Bloukaas-enbeetterrien

Aanbieding is alles as dit by dié terrien kom. Omdat beet enigiets waaraan dit raak vinnig pienk kleur, moet jy versigtig werk terwyl jy dié laag-op-laagskepping maak. Genoeg vir 1 mediumgroot broodpan Bereidingstyd: 10 minute

• 3 gaar bete, dungesny • 6 aarbeie, dungesny • 200g romerige bloukaas, gekrummel • 125ml mascarpone • varsgemaalde swartpeper • ment- en basilie-mikroblare

1

Voer ’n broodpan of vorm met kleefplastiek uit. Pak ’n laag beet en aarbeie; laat hulle effens oorvleuel om ’n soliede basis te vorm.

2 Meng die bloukaas en mascarpone en skep die helfte daarvan versigtig op die beet; druk dit vas in ’n egalige laag.

3 Strooi die peper en kruie oor voordat jy nog ’n laag beet en aarbeie byvoeg.

4 Skep die res van die kaas bo-op – smeer dit weer glad – en eindig met ’n laaste laag beet en aarbeie. Om voor te sit, keer die pan om op ’n mooi dienbord en haal die kleefplastiek af. Garneer met ekstra peper en kruie en sit voor met melba-roosterbrood of kraakbeskuitjies. Hoender parmesaan “Ek is dol oor hoe dié eenvoudige kombinasie van geurige krummelhoender, pesto, pasta en marinarasous lyk – dis altyd ’n apploustrekker!” sê Ramona. Genoeg vir 6 Bereidingstyd: 45 minute Gaarmaaktyd: 30 minute

• 6 hoenderborsfilette • sowat 250ml tuisgemaakte broodkrummels • 180ml gerasperde parmesaan • 1–3 knoffelhuisies (na smaak) • 1 bossie vars kruie soos origanum, pietersielie en tiemie • ’n goeie knippie paprika • 3 eiers • sowat 200ml meel • olie vir vlakbraai • 6 skyfies mozzarella • 6 takkies tiemie • sowat 80ml basiliepesto • sowat 300g pasta • vars basilie MARINARASOUS • 15ml olyfolie • 1 ui, gekap • 1 knoffelhuisie, gekap • 1 blik heel tamaties • 3 vars tamaties, gerasper oor die groot gate van ’n vierkantige rasper • 3 takkies vars origanum • ’n goeie knippie droë rissies • ’n goeie knippie suiker • 125ml room

1 Maak die sous Verhit die olyfolie in ’n kastrol oor matige hitte en braai die ui tot glansend. Voeg die knoffel by en roerbraai nog ’n minuut. Voeg die tamaties, kruie, speserye en suiker by. Gebruik ’n aartappeldrukker om die heel tamaties te verpulp. Bring tot kookpunt, verlaag die hitte en laat prut liggies, onbedek, terwyl jy die hoender gereed kry. Hou ’n oog op die sous se dikte.

2 Maak ’n insnyding aan die onderkant van elke hoenderborsie om dit oop te vlek. Sit dit dan tussen twee lae kleefplastiek en kap met ’n vleishamer tot dit sowat 1 cm dik is.

3 Meng die broodkrummels, 120 ml van die parmesaan, knoffel en kruie in ’n voedselverwerker. Geur met paprika, sout en peper en meng goed. Keer uit in ’n vlak bak vir die doopslag. Klits die eiers saam met die oorblywende parmesaan in ’n vlak bak en geur met ’n knippie sout en peper; hou die meel in ’n derde bak.

4 Doop die voorbereide hoender in die meel, dan die eiers, en laastens in die gegeurde krummels. Laat dit vir 10 minute in die yskas rus sodat die krummels kans kry om goed te kleef voor jy dit braai.

5 Voorverhit intussen die oond en bring die pastawater tot kookpunt. Vlakbraai die hoender aan weerskante tot mooi bruin. Doen dit in sarsies indien nodig sodat jou pan nie oorvol is nie. Sit die gebraaide hoender op ’n bakplaat, voeg die mozzarella en tiemie by en bak vir sowat 8–10 minute of tot die kaas begin borrel. Kook die pasta tot al dente en meng met die pesto. Voeg die room by die marinarasous en geur na smaak met sout en peper.

6 Om voor te sit Skep ’n lepel marinarasous op elke bord, gevolg deur ’n porsie pestopasta. Plaas ’n hoenderborsie bo-op en garneer met ’n paar vars basilieblare. >>

Ek maak gereeld ’n dubbelporsie marinara en sit dit in die vrieskas. – Ramona