Vis en murgpampoentjies in tamatiesous

Onder R130 • Genoeg vir 4 • Bereidingstyd: 20 minute Gaarmaaktyd: 35 minute

• 30ml olyfolie • 1 klein ui, gekap • 1 knoffelhuisie, gekap • 1 rooi brandrissie, gekap • 3 ansjovisfilette, gekap • sowat 60ml witwyn (opsioneel) • 1 blik heel tamaties

• ’n paar takkies vars tiemie • 60ml rooiwynasyn • 350g gemengde murgpampoentjies, dungesny • 4 porsies stokvisfilet • gekapte vars pietersielie • suurlemoenwiggies

1 Verhit die olie in ’n pan en braai die ui, knoffel en rissie daarin tot glansend. Voeg die ansjovis en witwyn by en kook vinnig vir ’n minuut of twee. Roer die blik tamatie by en druk fyn met ’n aartappeldrukker. Roer laaste die tiemie en asyn by en geur met sout en peper na smaak. Laat prut vir sowat 5–10 minute tot dik en geurig. Voeg ’n skeut water by as dit lyk of die sous te dik word.

2 Verhit ’n riffelpan en braai die murgpampoentjieskyfies in sarsies tot gaar met geurige swart lyntjies oraloor. (Of gebruik jou oond se roosterelement en maak alles gelyk gaar). Hou eenkant.

3 Skep die vis bo-op die tamatiesous in die pan en strooi die gaar murgpampoentjies ook oor. Sit die deksel op en laat stoom vir sowat 15–20 minute of tot die vis vlok. Geur die vis met sout en peper en sit voor met ’n strooisel vars pietersielie en die suurlemoenwiggies op geurige rys of kapokaartappels.