Vra die kenners

82 Wil jy weet hoe om ’n kraak in ’n dammetjie te verseël of isolering in ’n houthuis te installeer? Vra net – ons kry die antwoorde.

Tussen koud en warm

Elize Ingels van Centurion skryf Ons het ’n houthuis in die Bosveld wat ongelooflik warm in die somer en koud in die winter is. Selfs die lugversorger maak geen verskil nie. Die sinkdak het reeds drie lae spesiale verf gekry, maar dit het ook niks gehelp nie. Daar is geen plafon in die leefareas nie, net oop dakbalke. Kan IsoBoard teen die sinkdak geïnstalleer word? En kan ons dit gebruik vir die mure, wat ook nie ordentlik geïsoleer is nie?

Mark Russell, hoof van tegniese ondersteuning en bemarking by IsoBoard, antwoord Houthuise het eienskappe wat temperatuurbeheer moeilik maak; die belangrikste hiervan is ’n gebrek aan termiese massa. Dié term verwys na die afwesigheid van digte materiaal, soos bakstene of beton, wat hitte stadig absorbeer en vrystel en dan matige temperature help handhaaf. By houthuise is daar dikwels ook openinge by voeë, dakoorhange, deur- en vensterrame en vloerplanke (as die huis op ’n stellasie gebou is) waardeur lug kan ontsnap. Die tipe glasvensters sal ook ’n uitwerking hê, veral as daar nie juis wye dakoorhange of verandas is wat skadu gooi nie.

Die goeie nuus is dat jy IsoBoard direk teen jou dak kan aanbring deur die borde só te sny dat dit tussen die balke pas. Dit word met ’n spesiale gom geheg (wat ons verskaf). As alternatief kan jy die borde soos ’n gewone plafon aan die balke heg. In albei gevalle sal 50 mm dik borde geskik wees.

Jy kan IsoBoard aan die buite- of binnekant van die huis se mure heg; maak wel net seker dis beskerm teen stampe en direkte sonlig. Die beste sou wees om die IsoBoard agter ’n beskermende bekleding aan die buitekant van die huis te installeer. Jy sal waarskynlik borde van 30 mm hiervoor nodig hê. As jou huis op ’n stellasie gebou is, kan jy dit oorweeg om IsoBoard onder die vloerplanke ook aan te bring. Dit sal die binnenshuise temperatuur van jou huis in die winter dramaties verbeter. KONTAK isoboard.com

Laag op laag

Marita Visser van George skryf Ons het pas huis gekoop en wil graag die vloere verander. Die vorige eienaar het die gewone betonvloer bedek met Cemcrete se Colour Hardener Sealer en ek hou regtig nie van daardie industriële grys voorkoms nie; ek wil graag iets warmer hê soos ’n ligte, aardse taankleur of naaswit. Is daar ’n Cemcrete-produk waarmee dié Cemcrete-seëlaar bedek kan word?

Joanne Sykes, bemarkingsbestuurder by

Cemcrete, antwoord Ek stel voor jy gebruik CreteCote, ’n veelsydige, duursame vloerbedekking met ’n sementbasis. Dit word in twee lae aangewend en lewer ’n dekoratiewe afwerking van 1,6 mm dik.

Voor jy begin, moet jy seker maak dat daar niks op die vloer is wat die hegting kan belemmer nie, soos vullis, krake, gate, vet, olie of gom. Jy sal die vloer moet skuur om ontslae te raak van enige vorige seëllae en enige stof of los materiaal verwyder met ’n stofsuier en harde borsel. As jy ’n nuwe beton- of afgevlakte sementvloer bedek, maak seker die oppervlak is droog, glad, gelyk en stofvry; gee ’n nuwe vloer minstens 28 dae kans om droog te word.

Berei die oppervlak voor met twee lae Concrete Floor Primer; ’n erg poreuse vloer kan ’n derde laag nodig hê. Wend elke laag dwars oor die vorige aan, en laat dit droog word voor jy die volgende laag aanwend. Wag dan 24 uur tot dit droog is voor jy die CreteCote aanwend. Gee die CreteCote nog 24 uur kans om droog te word voor jy die hele vloer minstens twee keer spuit met water (kyk dat die water nêrens opdam nie). Maak seker die oppervlak is heeltemal skoon en droog (daar moet minder as 5% vog in die vloer wees) voor jy ’n seëlaar aanwend; Cemcrete vervaardig ’n verskeidenheid seëlaars wat hul maksimum hardheid gewoonlik ná 7–10 dae bereik. Wees in dié tyd versigtig en moenie meubels oor die vloer skuif nie; dit kan die bolaag beskadig. Sit liefs viltblokkies onder meubelpote. >>

KONTAK cemcrete.co.za