Borrie-tamaryn-en-jogurtsosaties met suurlemoen

Dié soet-suur sosaties smaak na meer!

Genoeg vir 6 sosaties • Bereidingstyd: 25 minute plus marineertyd • Gaarmaaktyd: sowat 25 minute • Oondtemperatuur: 180°C

• 18 hoenderdyfilette

• 1–2 suurlemoene, in wiggies gesny

• ’n paar suurlemoenblare

MARINADE

• 1 klein groen appel, geskil en gerasper

• 1ml elk cayennepeper, komyn en koljander

• 2cm vars gemmer, geskil en fyngerasper

• 2cm vars borriewortel, geskil en fyngerasper

• 1 knoffelhuisie, fyngerasper

• 30ml tamarynpasta

• 1 groen brandrissie, ontpit en gekap

• ’n knippie witsuiker

• 125ml ongegeurde jogurt

1 Meng al die marinadebestanddele en meng dit dan goed deur die hoender. Skep in ’n glasbak, bedek en marineer in die yskas vir ’n uur of twee, maar verkieslik oornag.

2 Geur die hoenderstukke met sout en peper en ryg op 6 sosatiestokkies saam met ’n paar suurlemoenwiggies en -blare vir die mooi. Onthou om houtstokkies vooraf in water te week anders kan dit vlam vat tydens die gaarmaakproses.

3 Voorverhit die oond. Verhit ook ’n gietyster-riffelpan tot lekker warm en braai die sosaties daarin tot dit ’n mooi kleur kry en geurige bruin lyntjies maak. Sit dan die pan met sosaties in die oond en bak vir nog 15 minute of tot die hoender deurgaar is. As jy nie ’n riffelpan het nie, kan jy die sosaties in ’n gewone pan braai en in ’n oondpan klaar bak; of braai oor matige kole tot gaar.