Hoenderkerrie met masala en tamatie

Dié kerrie is nog lekkerder die dag nadat dit gemaak is! Die oorskiet is heerlik net so saam met roti’s en rys, of oorweeg dit gepluis as ’n geurige pastei- of samoesa-vulsel.

Genoeg vir 4 ruim porsies • Bereidingstyd: 30 minute plus marineertyd • Gaarmaaktyd: sowat 1 uur • Oondtemperatuur: 180°C

• 4 hoenderkwarte (dy-en-boudjie)

• 45ml tamatiepasta

• 45ml tandoori-masala

• 2 knoffelhuisies, gekap

• 2cm vars gemmer, gerasper

• 125ml ongegeurde jogurt

• 1 blik heel tamaties

• 1 groen brandrissie, gekap

• 3ml rissievlokkies

• 125ml room

• 15ml olie

• 5ml vinkelsaad

• 1 mediumgroot botterskorsie, geskil en in blokkies gesny

• 125ml amandelvlokkies, gerooster

• vars koljander vir garnering (opsioneel)

1 Gebruik ’n skerp mes en maak so vyf diep diagonale insnydings in elke stuk hoender deur die vel – dit help dat die geure beter intrek. Meng nou die tamatiepasta, masala, knoffel, gemmer en jogurt, vryf dit goed in die hoender in en marineer vir minstens ’n uur (of oornag in die yskas).

2 Voorverhit die oond. Keer die tamaties uit in ’n oondbak en druk fyn met ’n aartappeldrukker. Skep die hoender met die marinade bo-op die tamaties. Strooi die vars en droë rissies oor en geur met sout en peper na smaak. Giet die room oor en bak vir sowat 1 uur tot die hoender smeltsag en geurig is. Die gaarmaaktyd gaan afhang van die grootte van die hoenderstukke.

3 Meng intussen die olie en vinkel deur die botterskorsie en geur met sout en peper. Bak dit sommer saam met die hoender tot gaar as jou oond groot genoeg is. Dit behoort nie langer as 35–40 minute te neem nie, so haal dit voor die hoender uit.

4 Om voor te sit, skep die gaar botterskorsie by die hoender en strooi die amandelvlokkies en koljander oor. Geniet met langkorrelrys en roti’s.