Geurige hoender-en-mangoslaai

Moenie skrik vir die resep se lang lys bestanddele nie, die geure is die fyn lees (en sny) werd.

Genoeg vir 6 • Bereidingstyd: 45 minute plus marineertyd • Gaarmaaktyd: 45 minute • Oondtemperatuur: 200°C

• 1 hoender, in stukke gesny (gebruik sommer ’n braaipak)

MARINADE

• 45ml sojasous

• 45ml vissous

• 45ml olie

• 2 brandrissie, gekap

• ’n knippie rissiepoeier

• 3ml Chinese 5-speserypoeier

• 3 knoffelhuisies, gekap

• 2cm gemmer, geskil en gekap

• 30ml ligbruinsuiker

SLAAISOUS

• 45ml vissous

• 45ml ryswynasyn

• 5ml suiker

• 30ml lemmetjie- of suurlemoensap

• gekapte brandrissie na smaak

SLAAI

• 2 ryp mango’s, geskil en in dun repies gesny

• 4 vet wortels, geskil en gerasper

• 125ml wit boontjiespruite

• 125ml grondboontjies, gekap

• ’n hand vol mentblare

• ’n groot hand vol vars koljanderblare

• ’n groot hand vol basilieblare

• 80ml brosgebraaide uievlokkies

1 Maak ’n paar diep kepe in elke stuk hoender deur die vel. Klits al die marinadebestanddele saam en meng dit deur die hoender in ’n glasbak met ’n deksel. Marineer vir ’n paar uur in die yskas.

2 Laat die hoender weer kamertemperatuur bereik en voorverhit die oond. Sit die hoender en al die marinade in ’n oondbak en rooster vir sowat 45 minute of tot gaar. Laat dan effens afkoel. Pluis en ontbeen die hoender en meng die pansappe deur die hoenderstukke.

3 Klits die slaaisousbestanddele saam en geur na smaak met sout en peper. Meng al die slaaibestanddele, behalwe die uievlokkies, met die geurige hoender en skep op ’n mooi bord. Sprinkel die slaaisous oor, gevolg deur die uievlokkies en sit dadelik voor terwyl die uie nog bros is. >>