Hoenderlewerpatee met muskadeljellie

Die geheim van ’n sysagte tekstuur is om nie die lewer doodgaar te maak nie.

Genoeg vir sowat 500 ml patee Bereidingstyd: 30 minute Gaarmaaktyd: 10 minute

• 15ml olie • 100g botter (en ekstra vir afronding) • 1 klein wit ui, geskil en baie fyn gekap • 1 vet knoffelhuisie, fyngekap • 500g hoenderlewers, skoongemaak • 3 takkies tiemie • 3 takkies platblaarpietersielie • ’n knippie elk wonderpeper, witpeper en neutmuskaat • 60ml brandewyn • vars salie, lourier of tiemie vir garnering • ’n dag oue Franse brood, in snytjies gesny en gerooster MUSKADELJELLIE • 2 velle gelatien • 250ml ligte muskadel

1 Verhit die olie en helfte van die botter saam in ’n dikboompan en braai die ui en knoffel tot glansend en geurig. Skep die uie uit die pan, maar behou die bottermengsel. Verhit weer die pan tot warm en skep die lewer daarin. Moenie te veel roer nie; laat die lewer eers kleur kry aan die een kant voor jy dit versigtig omdraai om die ander kant ook te braai. Geur met sout, peper, tiemie, pietersielie en die speserye. Sodra die lewer alkante mooi kleur het, maar steeds pienk in die middel is, voeg die brandewyn by en steek dit aan die brand – flambé, soos die Fransman sê. Werk versigtig! Die pan-vlamme sal vanself doodgaan; roer dan weer die gaar uie by die lewer en verwyder van die hitte. Stip met die res van die botter en laat afkoel.

2 Maak die lewer fyn met ’n staafmenger of voedselverwerker en skep dit in ’n bakkie. Maak glad bo-op en versier net so met vars kruie, of drup ’n lagie afgekoelde gesmelte botter bo-oor. Hou in die yskas tot nodig.

3 Maak die jellie Week die gelatien in water tot sag. Verhit die wyn versigtig in ’n klein kastrol tot net onder kookpunt (dit sal begin “stoom”, maar nog nie borrel nie). Verwyder van die hitte. Druk die vog uit die geweekte gelatien en roer dit by die warm wyn tot opgelos. Giet in ’n bakkie en laat stol.