Hoe gemaak met sonsteek?
Louise McIntosh van Johannesburg skryf
Ek sien gereeld mense stap met hul honde op warm teer op die hitte van die dag! Wat is die tekens van sonsteek en hoe gemaak as jy dink jou troeteldier het dit?
Dr. Rouxlene Sheridan van die Tygerberg-dierehospitaal antwoord Sonsteek is lewensgevaarlik en moet altyd as ’n noodgeval behandel word. Dit kan swelling van die brein, interne bloeding, nierversaking en abnormale bloedstolling veroorsaak. Kyk uit vir die volgende:
Alle troeteldiere Duiseligheid, braking, min of geen urinering, vinnige asemhaling, ’n helderrooi tong, donkerrooi óf bleek tandvleis, diarree, swakheid en lusteloosheid.
Addisioneel by honde ’n Bedwelmde voorkoms, kwyl of oormatige speeksel, ongekoördineerde beweging en floutes.
Addisioneel by katte Angstigheid (die kat stap aanhoudend heen en weer), neusbloeding, toevalle en spierbewing. Hoe kan ek sonsteek voorkom? • Maak seker jou troeteldier is bedags in ’n koel plek met goeie ventilering en vars, skoon water. Dié wat buite bly, moet skadu hê. • Moet nooit ’n troeteldier in ’n kar los nie. • Moenie in warm weer met hulle oefen nie. • Vermy warm sand, beton en teer. As jy die agterkant van jou hand op die teer sit en dit nie vir vyf sekondes daar kan hou nie, is dit te warm vir jou troeteldier se pote. Wat moet ek doen as ek vermoed my troeteldier het sonsteek? • Verwyder jou troeteldier dadelik uit die warm omgewing. • Spuit koel water op sy pels en vel. Sit dan ’n waaier aan om hitteverlies aan te help. Jy kan ook ’n koue, nat handdoek op sy rug sit, of hom in koue water sit. Indien jou troeteldier bewusteloos is, maak seker daar kom nie water in sy neus of mond nie – dit kan tot aspirasie-pneumonie lei. • Laat jou troeteldier soveel koel water drink as wat hy wil sonder om hom te dwing.
ONTHOU Al lyk dit of jou troeteldier herstel of al vermoed jy net hy het sonsteek, laat hom deur ’n veearts ondersoek. Ry veearts toe met oop vensters of die lugverkoeling aan. Noodbehandeling sluit ’n drup, verkoelende enemas, aanvullende suurstof, medikasie, bloedtoetse vir orgaanfunksie, asook deurlopende monitering in.
KONTAK tah.co.za