Enchiladas met kaassous

’n Witsous of bechamel is die basis van talle geregte en maklik om te berei – op die stoof of in die mikrogolfoond as die tyd knyp. Geur altyd goed met sout, peper en ’n knippie neutmuskaat, of jy nou kaas gaan byvoeg of nie. Genoeg vir 6 Bereidingstyd: 35 minute Gaarmaaktyd: 50 minute

• 500 ml gepluisde braaihoender • 125 ml van jou gunsteling-braaisous • 6 tortillas • 30 ml ingelegde jalapeño-skyfies

3 sprietuie, gekap • ’n strooisel vars koljander KAASSOUS • 50 ml botter • 50 ml meel • 500 ml melk, warm • 1 lourierblaar • 5 ml Dijonmosterd • 250 ml gerasperde beleë cheddarkaas • neutmuskaat

1 Maak die kaassous terwyl die oond voorverhit. Smelt die botter oor matige hitte in ’n klein kastrol. Voeg die meel by en klits met ’n ballonklitser tot glad (dié mengsel word ’n “roux” genoem). Braai vir ’n minuut tot skuimerig. Verwyder die kastrol van die hitte en klits die melk geleidelik by tot glad. Sit terug op die hitte, voeg die lourierblaar by en kook oor matige hitte tot dik; roer die sous deurentyd rustig sodat dit nie brand nie. Verwyder van die hitte, gooi die lourierblaar weg en klits die mosterd en helfte van die kaas by. Geur met sout, peper en neut na smaak.

2 Meng van die braaisous deur die hoender en verdeel dit tussen die tortillas. Maak ’n pakkie deur die linker- en regterkant oor die vulsel te vou en dit dan op te rol. Rangskik die pakkies redelik styf teen mekaar in ’n gesmeerde oondbak. Giet die kaassous oor en strooi die oorblywende kaas bo-oor. Bak vir sowat 20 minute of tot die kaas borrel en mooi bruin is. Sit voor met die rissies, sprietuie en koljander bo-oor gestrooi.