Minder is meer
So lief soos sy vir kleur en treffende bykomstighede is, sê Sharon haar dekorfilosofie is om dinge eenvoudig te hou. “Ek het al by die mooiste huise ingestap, dan is dit volgestop met te veel losgoed en botsende style. Dis wanneer ek vir ’n kliënt sê: ‘Te veel mooi is nie mooi nie.’ Met ander woorde, minder is meer.” Sharon en Henau volg dié beginsel ook in hul eie huis. Dis só versier dat dit ’n ontspanne, ingeleefde atmosfeer het, maar die paartjie het ook speelse elemente bygevoeg sodat gaste altyd kan uitsien na iets besonders. ’n Smaakvolle kombinasie van erfgoed, pragtige tweedehandse vondste en ’n paar treffende, meer kontemporêre artikels voltooi die prentjie.
“Ons huis is versier met goed wat ons regtig na aan die hart lê – of dit nou ’n stuk lap met sentimentele waarde is as strooikussing-oortreksel, ’n erfstuk van een van ons oumas, ’n tafel wat van ou steierplanke gemaak is of ’n speelgoedkis uit iemand se kinderdae,” sê Sharon. “En natuurlik kan ek dit alles nuwe lewe gee met ’n leksel verf!”
Die kleure waarmee Sharon die graagste werk is swart, room, roesrooi en -bruin, en geel. “Dit voel vir my die warmste en gemaklikste,” verduidelik sy.
“Party oggende staan ek vol inspirasie op, dan besluit ek sommer om die kaste in ons slaapkamer met die kwas by te dam. Die TV-kas in ons leefarea is al minstens vyf keer geverf – as ek reg onthou!” >>
Danksy ’n pasgemaakte kas is ’n voorheen onbenutte nis in die kombuis nou ’n praktiese ruimte. Die buitekant van Supawood is matswart geverf vir ’n tikkie Skandi-styl, terwyl die binnekant van bekostigbare laaghout is. Kombuiskas deur Danmel Melamine City
In die hoofslaapkamer is die houtplafon wit geverf, wat die huis se oorspronklike meranti-balke beklemtoon. Die muur agter die bed is dofpienk geverf om warmte aan die ruimte te verleen. Rottangtafel van Oom Theo se Winkel