#1 In styl
WAAR Lynnwood, Pretoria ORIËNTASIE Noord Rouxléne Merbold se buurvrou – iemand wat sy as uiters gesofistikeerd beskou – het ’n ruk gelede by haar kom kuier, en dié het genoem dat sy nie juis Rouxléne se styl kon peil nie. Jy sou dink dat Rouxléne sou aanstoot neem, maar nee: Sy glimlag net wanneer sy dié storie vertel, want sy erken self sy het niks regtig beplan nie; alles het net oor die jare só vorm aangeneem.
“Ek het die Art Deco-leunstoele aanlyn vir ’n appel en ’n ei gekry en dit laat herstoffeer,” sê sy. “En die leerbank van Incanda het eers onlangs bygekom. Ek sou seker my styl as moderne Art Deco kon beskryf, maar my dekor bestaan uit ’n moderne koffietafel, ’n geblomde vintage-kelim en ’n Ngunivel-ottoman – dinge wat hemelsbreed verskil, maar hulle ‘gesels’ met mekaar!”
Toe die Merbolds hul huis uit die sestigerjare in 2010 opgeknap het, is die meeste van die binneruimtes vergroot deur mure uit te breek. Die leefvertrek skakel nou in ’n oopplan-ontwerp met die eetkamer en kombuis.
“Ons het die matte opgelig en was aangenaam verras om regte eikehoutblokkies daaronder te ontdek – dis nie iets wat jy elke dag sien nie! Ons het dit laat skuur en herstel,” sê Rouxléne.
Dit werk, want ...
Die leefruimte weerspieël Rouxléne se liefde vir ou en nuwe style, asook haar speelse, soms aweregse smaak. “Net nou die dag het ek gedink aan wat ek sou laat gaan wanneer ek die dag afskaal en aftree, en ek het besef omtrent al my ‘goeters’ in die sitkamer sal moet saamgaan!” sê sy laggend.
Buiten interessante dekor is die groot pluspunt in die leefvertrek sy ruim grootte en die vloei tussen die onderskeie areas. “Omdat ons soveel ruimte het, kan ek maklik meubels rondskuif om die voorkoms af te wissel soos wat die seisoene verander. In die winter kuier ons om die kaggel, en in die somer leef ons buitentoe en maak ons meer van die aangrensende stoepe gebruik. “Vandat ons ons DStv-subskripsie ’n paar jaar gelede gestaak het, het die TV-kamer ’n wit olifant geword. Nou bring ons al ons tyd in die sitkamer deur; soms speel ons bordspeletjies met ons seun Günther, maar meestal lê ons net op die rusbank en lees!”