#4 Opgeknap met flair!
WAAR Durbanville ORIËNTASIE Noord Annelie Carstens is nou al ’n ster in eie reg. Sy het in 2012 die eerste keer in Tuis verskyn toe haar en haar seun Wilha se kombuis-regrukprojek die top-3 gehaal het in ons gewilde Regruk met Flair-kompetisie.
En kan jy glo? Toe Tuis saam met die Afrikaanse leefstylkanaal VIA begin soek na ’n huis om reg te ruk vir die 1, 2, 3 fixit!-program op TV, was haar huis die mees geskikte een vir dié naelbytstryd.
Die kombuis in Annelie se huis in Durbanville buite Kaapstad was nog presies soos dit was met die tydskrif se kompetisie in 2012. Maar wat ’n mens nie toe gesien het nie, was die ruim leefkamer digby die kombuis en eetkamer, want dié was in regte sewentig-styl van die kombuis geskei met ’n muur.
“Ek het die huis so gekoop,” onthou Annelie. “Maar ek wou dit uit die staanspoor uitbreek vir beter vloei.”
Sy het by ’n ingenieur gaan aanklop oor die moontlikhede van ’n oopplanontwerp, maar dié het gesê dis ’n dra-muur, en staalbalke sal nodig wees. “Dit het geklink na baie geld, en ek was moedeloos,” onthou sy. “Toe los ek dit maar.”
Met die beplanning van 1, 2, 3 fixit! kon Annelie se droom uiteindelik waar word. Die muur is afgebreek en die staalbalk is ingesit, waarna dit netjies met plafonbord bedek is.
Met die ruimte oop en aaneenvloeiend kon die werk begin. In dié werklikheidsreeks moes drie spanne Annelie se kombuis, eetkamer en leefvertrek onderskeidelik vernuwe. Die oranje span, Dewald en Erika van Zyl, het die leefgedeelte reggeruk – ’n taak wat hulle volgens Annelie se inspirasiebord aangepak het.
En hulle het wondere verrig, sê Annelie. Nou is dié oopplanvertrek, wat naatloos met die kombuis en eetkamer aaneenskakel, ’n plek vir lekker kuier. “En ons kán kuier!” sê sy. >>
Soos gesien op VIA! Moenie die slotepisode van 1, 2, 3 fixit! op 23 Mei op VIA (DStvkanaal 147) misloop nie.