Kortpadkos Aandete in ’n japtrap
Skink ’n glas wyn en verbeel jou jy is op ’n kaalvoet-vakansie op ’n Griekse eiland en daar is lam met vars kruie, feta en bone op die spyskaart ...
Ribtjoppies met pesto en ment
Kruiesouse soos chimichurri en pesto is altyd ’n wenner saam met lam.
Onder R150 • Genoeg vir 4 • Bereidingstyd: 5 minute Gaarmaaktyd: niks meer as 16 minute nie
• 8 lamsribtjoppies (2 per persoon)
• 15ml olyfolie
• 5ml gestampte koljander
• 30ml vars suurlemoensap
• ’n hand vol vars mentblare
• 15ml rooiwynasyn
• 1 rooi brandrissie, fyngekap (opsioneel)
• 45ml goeie vars basiliepesto (ons hou van Pesto Princess)
1 Meng die lamstjops met die olyfolie, koljander en suurlemoen en laat staan ’n paar minute terwyl jy die sous aanmekaarslaan.
2 Kap die ment fyn. Meng dit saam met die asyn en brandrissie by die pesto en oordeel of dit nog ’n skeutjie olie of selfs water kort sodat die tekstuur meer sous as smeer is.
3 Braai nou die tjoppies oor matige kole vir sowat 5–8 minute aan ’n kant tot net pienk en sappig. Geur na smaak met sout en swartpeper. Jy kan ook ’n dikboompan gebruik om die tjops oraloor goudbruin te braai, nes jy verkies. Drup die sous oor en sit voor met aartappelslaai.
Jogurt-saaltjops
’n Saaltjoppie is basies twee lendetjops aaneen en lyk vir my alte feestelik. Braai gerus oor die kole as jy verkies.
Onder R130 • Genoeg vir 4 • Bereidingstyd: 10 minute, plus marineertyd • Gaarmaaktyd: sowat 20 minute Oondtemperatuur: 180°C
• 4 saaltjops (of 8 lendetjops)
• ’n klont botter en ’n skeut kanola-olie
• vars suurlemoenwiggies vir voorsit
MARINADE
• 3 knoffelhuisies, gekap
• 30ml fyngerasperde ui
• 1 duim vars gemmer, gerasper
• 125 ml jogurt
• ’n knippie cayennepeper
• ’n knippie fyn borrie
• 1 takkie roosmaryn, blaartjies gestroop
• 5 ml vars suurlemoensap
1 Meng al die marinadebestanddele, vryf dit goed oor die vleis en marineer by kamertemperatuur – minstens 30 minute of oornag.
2 Voorverhit die oond. Vee enige oortollige marinade van die vleis af. Verhit die botter en olie oor matige hitte in ’n oondvaste pan. Braai die vleis tot mooi bruin aan die een kant (sowat 5–7 minute). Draai om en braai ook 5–7 minute aan die ander kant. Geur na smaak met sout en peper en sit nou die pan in die oond vir sowat 5 minute vir ’n sappige, pienk tjop. Laat rus vir 5 minute en sit voor met ’n ekstra lepel jogurt en vars suurlemoensap.
Lam-en-feta-‘sliders’ (klein burgers)
Ek gebruik lamsworsies wat reeds bindmiddel en kruie bevat as kortpad vir dié geurige burgers. Vervang dit gerus met lamsmaalvleis en voeg vars kruie na smaak by.
Onder R110 • Genoeg vir 4 porsies (twee burgers per persoon) Bereidingstyd: 15 minute • Gaarmaaktyd: sowat 10 minute
• 500g lamswors met roosmaryn
• 60ml gekapte pekanneute
• 60ml rooi soetrissieblokkies
• 100g feta, gekrummel
• ’n knippie gedroogde origanum
• olie vir vlakbraai
• 8 klein pitabrode
• 200g peulertjies, gesnipper
• hoemoes
1 Verwyder die derm van die wors en meng die vleis met die neute, soetrissie, feta en origanum. Ekstra sout en peper is nie nodig nie. Vorm met nat hande in agt ewe groot frikkadelle; druk elkeen plat om ’n burger te vorm.
2 Verhit die olie in ’n dikboompan en braai die burgers tot goudbruin alkante en net-net gaar (ek hou daarvan nog so effens pienk binne). Jy kan ook die burgers oor die kole braai.
3 Rooster die pitabrode in jou broodrooster, oor die kole of in ’n droë pan. Smeer elk met ’n dik laag hoemoes, skep ’n hopie peulertjies bo-op en bedek met ’n vuurwarm burger.
Lamsribbetjie met bone
Dié resep is min moeite, maar die gaarmaaktyd is lank om ’n doeksagte resultaat te verseker. Druk dit in die oond en vergeet daarvan, of vervang die rib met eenhap-tjoppies en sit hulle pienk voor.
Onder R125 • Genoeg vir 4 • Bereidingstyd: 15 minute Oondtemperatuur: 180°C • Gaarmaaktyd: 1 uur
• 8–12 individuele lamsribbetjies
• sowat 15ml biltongspeserymengsel*
• 30ml rooiwynasyn
• 2 blikke cannellini-bone, gespoel en gedreineer
• 200 g kersietamaties, gehalveer
• sowat 60 ml aftreksel
• ’n strooisel vars koljander en suurlemoensap
1 Rol die lam in die speserye en asyn en laat staan vir sowat 15 minute tot 1 uur (as die tyd toelaat) om te marineer. Druk droog en braai nou die vleis in ’n warm oondvaste pan sonder om olie by te voeg – lam is gewoonlik redelik vetterig. (Kyk maar hoe dit gaan en voeg ’n paar druppels olie by as jy voel dis nodig.)
2 Voorverhit die oond. Sodra die vleis mooi kleur het, sit dit net so in die pan in die oond en bak vir 45 minute.
3 Haal die vleis uit die oond. Skep die bone, tamatie, aftreksel, kruie en suurlemoensap by. Rangskik die vleis bo-op en bak vir nog sowat 15 minute. Sit voor met ’n vars slaai. * Biltongspeserymengsel bevat reeds gestampte koljander, vleisspeserye en sout, en bied ’n gerieflike kortpad wanneer jy vinnig kosmaak.