Gevulde calamari

Genoeg vir 4–6 as voorgereg Bereidingstyd: 30 minute Gaarmaaktyd: 15 minute

• 20 middelslag-calamaribuise, in melk geweek vir 1 uur*

• sowat 125ml roomkaas

• sowat 100g fetakaas, gekrummel

• ’n strooisel vars origanum

• 20 matige pikantrissies

• sowat 45ml olyfolie

• suurlemoensap en gerasperde suurlemoenskil na smaak

1 Was die calamaribuise onder lopende koue water en druk goed droog met ’n kombuislappie (kombuispapier sit vas). Maak seker die vinne en enige ander harde kraakbeen is verwyder.

2 Meng die roomkaas en feta. Geur na smaak met ’n bietjie varsgemaalde swartpeper, ’n paar origanumblaartjies en gerasperde suurlemoenskil. Stop die pikantrissies met die mengsel en druk 1 gestopte rissie in elke calamaribuis. Indien daar roomkaasmengsel oor is, verdeel dit ook tussen die buise en steek die opening toe met ’n peuselstokkie (of maak soos die puriste wat dit toewerk met naald en donker gare sodat dit maklik verwyder kan word).

3 Verhit die olyfolie in ’n diep pan en braai die buise versigtig in sarsies. Dis altyd mooi as die buise ’n kleurtjie kry, maar moenie oorgaar maak nie. Ná ’n paar minute aan ’n kant behoort die buise nie meer deursigtig te wees nie en is dit gaar maar steeds sag. Sit warm voor met ’n ekstra strooisel origanum en suurlemoensap na smaak. Pangebraaide kersietamaties is ook heerlik as jy ’n sousie wil hê. Braai die tamaties in ’n klont botter nadat die calamaribuise klaar gebraai is.

* Dis dalk ’n wolhaarstorie, maar ek vind dit gee ’n beter resultaat as ek die calamari so marineer.