RYSPILAF MET BOTTERGEBRAAIDE SAMPIOENE EN PARMESAANKAAS
Botter-en-biergebraaide sampioene gaan selfs vleiseters se harte steel in dié vegetariese treffer. Genoeg vir 6 ruim porsies • Bereidingstyd: 10 minute • Gaarmaaktyd: 30 minute
• 30ml elk olyfolie en botter • 1 ui, fyngekap • 200g dwergsampioene, gehalveer • 1 knoffelhuisie, gekap • 500ml jasmyn- of langkorrelrys • 60ml ligte bier • sowat 500ml groenteaftreksel • 60ml platblaarpietersielie, gekap • 125ml heel amandels, gerooster en gekap • 1 groot ryp avokado, geskil en in blokkies gesny • 15ml vars suurlemoensap • parmesaanskaafsels vir garnering
1 Verhit die olie en botter saam in ’n dikboomkastrol en roerbraai die uie tot sag en glansend. Roer die sampioene by en braai tot goudbruin. Voeg die knoffel en rys by en roer tot al die korrels met olie bedek is. 2 Voeg die bier by en kook driftig tot die meeste van die bier weggekook het. Voeg nou die aftreksel by, verlaag die hitte en laat prut die rys vir sowat 20–25 minute. Voeg nog aftreksel by indien alles geabsorbeer en weggekook is voor die rys gaar is. 3 Verwyder die rys van die hitte sodra dit al dente is en strooi die pietersielie en amandels oor. Proe en geur na smaak met sout en peper. Rond af met die avokado, suurlemoensap en parmesaan en sit warm of teen kamertemperatuur voor.
Wenk Die aardse geure is ook lekker saam met ander grane soos gort, bruinrys of koeskoes in plaas van witrys. >>
Boetiekbier moet smaak asof dit met puik bestanddele gebrou is deur passievolle mense. – Karl Tessendorf en Greg Gilowey, Beer Country’s Beer Fire Food