VARKWORSIE-EN-APPELSLAAI MET PRETZEL-CROUTONS
Geknoopte, goudbruin pretzels word tradisioneel gebak met ’n strooisel soutvlokkies en dié snoephappie maak die allerlekkerste bros croutons. Genoeg vir 4 • Bereidingstyd: 25 minute • Gaarmaaktyd: 20 minute • Oondtemperatuur: 200°C
• 1 groot, sagte pretzel • 4 klein appels, in dun skyfies gesny • sowat 30ml heuning • 30ml olyfolie • 15ml botter • 24 chipolata-varkworsies • sowat 60ml ligte bier • 10ml korrelmosterd • 45ml appelasyn • 2 klein slaaikoppies (“baby gem lettuce hearts”), in blare gebreek
1 Voorverhit die oond. Sny die pretzel in skyfies van sowat 1cm dik en sprei dit uit op ’n bakplaat. Bak vir sowat 5 minute, draai die croutons om en bak vir nog 5–10 minute of tot bros alkante. (Vir ’n ryker resultaat, braai die croutons in botter in ’n pan.) 2 Sprei die appelskyfies in ’n enkellaag uit op ’n tweede bakplaat. Drup die heuning en olie oraloor, geur met sout en peper en bak die appelskyfies tot gekaramelliseer en sag (sowat 10 minute aan elke kant). Oordeel self of die roosterelement nodig is vir so ’n ekstra bietjie karamellisering sodra die appelskyfies sag is. 3 Verhit nou die botter in ’n pan en braai die chipolatas tot goudbruin oraloor. Voeg die bier en mosterd by en laat stoom met die deksel op tot deurgaar. Roer die asyn by die pansappe; roer die appelskyfies ook versigtig by. Proe en geur na smaak met sout en peper. 4 Skep die warm panmengsel op die blaarslaai en strooi die croutons oor. Smul dadelik terwyl die slaai warm is. >>