BIEFBORSSTUK MET PEPER EN BIER-UIE
Biefborsstuk (“brisket”) is nou groot nuus in koskringe en word op verskeie maniere gerooster en gerook en veral as koue vleis op broodjies voorgesit. Die snit kan baie vet aan hê – kies ’n stuk met ’n eweredige, dun lagie vet. Genoeg vir 6 Bereidingstyd: 1 uur Gaarmaaktyd: 3 uur Oondtemperatuur: 160 °C
• 1kg gepekelde biefborsstuk • 300ml aftreksel SPESERYMENGSEL • 10ml reënboogpeperkorrels, gestamp • 10ml koljandersaad, gestamp • 5ml mosterdsaadjies, gestamp • 5ml elk growwe seesout en bruinsuiker • 5ml knoffelvlokkies en gedroogde origanum • 10ml gerookte paprika • ’n knippie rissiepoeier BIER-UIE • 30ml olyfolie • 2 groot uie, in dun ringe gesny • sowat 125ml van die vleis se kookvloeistof • 15ml suiker • knippie sout • 3 takkies tiemie • sowat 80ml bier • 45ml balsemiekasyn
1 Meng al die speserye en hou eenkant. Spoel die pekel van die vleis af en druk droog. Maak met ’n skerp messie insnydings oraloor die vetlaag sonder om in die vleis in te sny. Verhit ’n diep oondvaste pan en braai die vetlaag bruin. Verwyder die pan van die hitte en draai die vleis om sodat die vetlaag bo is. Vryf die speserye oor, voeg die aftreksel by sodat dit die vleis tot net onder die speserylaag bedek, en bak met ’n deksel op in die oond vir sowat 3 uur. Haal uit die oond en laat rus terwyl jy die uie maak. 2 Verhit die olie, uie en kookvloeistof saam in ’n dikboompan en kook die uie stadig oor lae hitte tot al die vloeistof verdamp het en die uie sag en glansend is. Braai die uie nog so ’n bietjie tot dit begin kleur kry. Voeg die suiker, sout en tiemie by en braai nog ’n paar minute. Roer nou die bier en asyn by en kook tot glansend. 3 Gebruik ’n elektriese of baie skerp mes om die vleis in dun skyfies te sny. Sit dit voor met die uie, mosterd en romerige peperwortelsous saam met kapokaartappels en soetwortels, of geniet dit op ’n vars rolletjie in deli-styl.