Vir dié gesin beteken die feestyd ou tradisies en nuwe herinneringe
Vir dié gesin gaan die feestyd oor ou tradisies, nuwe herinneringe en lieflike dekor!
-
Deur Kim Arendse • Foto’s Francois Oberholster • Produksie Marian van Wyk
Wonderlike herinneringe aan familievieringe tydens die feestyd inspireer Lynda Burgess vandag nog.
“Kersfees was vir my altyd so wonderlik met al die liefde, opwinding en afwagting,” vertel sy. “Ek is in my hart nog ’n kind en dit het my nog altyd bygebly. Dis so lekker om Kersfees deur ’n kind se oë te sien en ek maak nog elke Oukersaand ’n wens wanneer ek die eerste ster sien.”
Die Kersboom word gewoonlik vroeg in Desember staangemaak en mooigemaak met versierings wat deur die jare versamel is.
“Ek gebruik graag room en goud saam met ‘sneeuvlokkies’ en titsels rooi hier en daar. Die basis van my Kers-dekor is baie groenigheid saam met wit versiersels. Daarby is takbokke en kouse wat van die kaggel se mantel af hang, ook ’n moet,” sê Lynda. Sy loer graag by amazon.com vir winterige Kers-dekor, by Santa’s Warehouse vir interessante kopies en by Paradiso vir blomme en groenigheid.
Sondagkos
Op Kersdag staan Lynda, Nic en die kinders vroeg op om geskenke oop te maak. Daarna beweeg almal kombuis toe en begin met die kosvoorbereiding – op Kersdag eet die gesin Sondagkos, maar met baie meer trimmings!
“Daar is altyd ’n gewoel-en-werskaf in die kombuis, met ligte paniek af en toe voor middagete gereed is,” sê Lynda. “My ma en suster kom eet gewoonlik by ons en verlede jaar het my dogter, Mycaila, haar man en hul babadogter van Skotland gekom om Kersfees saam met ons te wees.
Die huis was omtrént bedrywig!
“Ek hou van die manier waarop Kersfees gesinne en vriende bymekaarbring. Ek wil ook sulke spesiale tye en tradisies in ons huis skep, en Kersfees-dekor vorm die perfekte agtergrond!”
’n Broodnodige regruk
Die gesin het in Augustus 2018 by hul huis ingetrek en dadelik opknapplanne begin maak. Hulle het gehou van die huis se grootte en die spits dak met ontblote balke op die tweede verdieping. Die struktuur het ’n plattelandse gevoel, maar hulle wou die outydse Kaaps-Hollandse styl verander ter wille van beter vloei vir lekker kuiers.
“Die sitkamer in ons vorige huis was byvoorbeeld te klein vir groot familiekuiers, en die styl het ook nie vir ons gewerk nie. Dié huis het ’n goeie raamwerk en ons kon die potensiaal sien, al het dit opknapwerk en ’n vars aanslag geverg.” >>
Neutrale agtergrond
Lynda was nog altyd passievol oor dekor. “As kind het ek gereeld my slaapkamer oorgedoen,” sê sy. Haar styl het oor die jare verander en dié huis is die eerste een waar sy ’n neutrale tema gekies het. “In ons vorige huis was daar baie blou en groen met net ’n paar neutrale skakerings. Hier wou ons ’n kalm en ontspanne moderne plaashuis skep waar kleur nie té opvallend is nie.”
Om ’n knus en gesellige ruimte te skep het Lynda haar nuut opgeknapte huis ingerig met gemaklike meubels, handgemaakte houtkaste en bonkige houttafels.
“Ek vernuwe graag meubels met verf en daar is ’n hele paar stukke in ons huis wat ek self gemaak of opgeknap het,” sê sy.
“Sagte lap en teksture wat lekker is om aan te vat, val beslis in my smaak. Ek bly sover moontlik weg van stowwe van dierlike oorsprong en ek hou ook nie van kunspels nie. Ek het ’n sagte plekkie vir boheemse patrone met verhewe motiewe, asook macramé. Dit, saam met die groenigheid in die huis, skep die rustige gevoel wat ons van die begin af beplan het.”
Ek wou ’n badkamer in die tropiese styl hê wat dit laat voel of jy met vakansie is. – Lynda