Waterwys plant van die maand
Indiese meidoring
Indiese meidoring (Rhaphiolepis-spp.) is ’n lieflike immergroen, kouebestande struik uit Asië met ’n netjiese groeiwyse en blink, leeragtige blare (nuwes is dikwels rooi-brons). Die plant dra klein blomtrosse in wit of skakerings van pienk: Rhaphiolepis x delacourii het geurige wit blomme met ’n pienk skynsel, terwyl die ‘Kruschenia’-variëteit pienk blomme het. Kweek spesies en kultivars as agtergrondstruike of snoei die struike in heinings of skerms. Plant dit in volson, of gedeeltelike skadu in uiters warm streke.