Massa-aanplantings: Só maak jy maklik en ekonomies tuin
Gee trefkrag met groot groepe van dieselfde plante, selfs in ’n klein tuin.
As daar baie van een soort plant in ’n bedding of tuinkamer groei, het jou tuin trefkrag én is jou werk minder! Pietman Diener, tuinkenner van Stellenbosch, vertel meer:
“Massa-aanplanting het baie voordele en kan in groot sowel as kleiner tuine gebruik word. In ’n groot tuin soos dié van Larisa Brody (sien die storie op bl. 90) kan dit heeltemal oorweldigend raak as jy ’n te groot verskeidenheid plante in al die verskillende dele of tuinkamers het. Deur in party van die kamers ’n groep van net een soort plant te gebruik, skep jy ’n rustiger gevoel met groter trefkrag. Jy sien die plante regtig raak,” verduidelik hy. >>
Onderhoud
Nog ’n voordeel van massa-aanplanting is dat dit jou werklas verminder en jou tuin meer ekonomies en waterwys maak. Aangesien die hele bedding dieselfde waterbehoeftes het, kan jy daarvolgens natgooi en kry niks onnodig water nie.
“Onderhoud is ook makliker,” sê Pietman. “Al die plante vereis dieselfde aandag op dieselfde tyd. Dis ook meer ekonomies om die bedding vol te kry – verdeel bloot die bestaande plante of maak steggies daarvan.”
Baie plante wat geskik is vir massaaanplanting verg min sorg nadat hulle geplant is. Ornamentele grasse is ’n baie goeie keuse en hoef net een keer per jaar kort gesny te word. By agapante sny jy bloot die dooie blomkoppe af, Dietes het geen onderhoud nodig nie en ’n grondbedekker soos mondogras lyk met die minimum onderhoud altyd mooi.
’n Rits van bepaalde plante kan selfs in ’n heining gesnoei word. Al moet dit wel van tyd tot tyd netjies gesny word, wat natuurlik werk vereis, maak dit indruk met relatief min moeite.
Massa-aanplanting is ook ’n baie goeie manier om die aandag op tuinornamente soos ’n beeld of ’n pot te vestig, sê Pietman. “Deur een tipe plant rondom so ’n element te hê, sien jy dít eerder as die plante daarrondom raak.”
As jou tuin klein is, kan jy massaaanplantings eenvoudig op ’n kleiner skaal doen. “Deur byvoorbeeld vyf tot sewe van ’n soort saam te plant, skep jy in die klein ruimte die indruk van oorvloed, maar ook van eenvoud. En as jy net ’n stoep of ’n balkon het, plant ’n paar van dieselfde plante in potte en groepeer hulle saam. Goeie keuses vir dié doel is malvas op ’n sonnige balkon en fuchsias op ’n skaduryke stoep.”