Wat’s nuut aan die dekorfront
Uit Lapland
Studio G se nuwe Palmero-versameling (R800/m) is nou te kry in Suid-Afrika, eksklusief by Hertex. Dis gemaak van geborselde suiwer katoen, en spog met botaniese ontwerpe, kunstige teksture en sagter geometriese patrone. Verken jou wilde sy met diep, donker skakerings en treffende blommotiewe, of skep ’n kalm toevlug met fyner flora en sagter kleure.
Nuut op straat
Sheet Street het sy eie reeks basiese meubels, soos rakke, kanttafels, stoele en lampe, bekendgestel. Die reeks is beskikbaar by uitgesoekte winkels, insluitend Cape Gate, Menlyn
Park Shopping Centre, Mafikeng Mall, Limpopo Mall en The Pavilion. Besoek sheetstreet.com.
Kanttafeltjie met houtblad (R499,99)
Laaikas met vier laaie
(R599,99)
SKEP EN INNOVEER!
WIE Mariana Smal WAAR Hermanus BESIGHEID Beli Em HAAR WERK Toe Mariana Smal lus raak vir ’n kreatiewe uitdaging, het sy haar vaardighede in pottebakkery en meer onlangse ervaring van sement saamgevoeg en Beli Em Designs begin. Sy ontwerp tafellampe en hangligte wat met die hand gemaak word uit beton en hout.
“Ek hou van minimalistiese en industriële ontwerp, en die kombinasie van materiale in die lampe komplementeer mekaar wonderlik,” vertel sy. Sien haar reeks van vier tafellampe en vier hangligte (vanaf R650) by Facebook.com/Beli.EmDesigns.
Local is lekker
Swartland het onlangs Summit XPS Insulation Board bekendgestel as deel van hul Summit-reeks wat bestaan uit isolasie- en dekoratiewe plafonprodukte. Die plaaslik vervaardigde XPS is in wese ’n uitgeperste polistireenskuim-bord wat ontwerp is om ’n enkele laag termiese en vogbeskerming op mure, dakke of vloere te skep, en so by te dra tot die algehele energiedoeltreffendheid van die gebou. Vir nog inligting, besoek summitxps.co.za.
IN JOU MANDJIE
Block Basics is ’n nuwe aanlynwinkel met prettige, funksionele en trendy dekorstaatmakers uitgesoek deur die span agter Block & Chisel. Die reeks bestaan uit ’n goeie verskeidenheid meubels en huisware wat só gekies is dat jy stukke maklik kan meng en pas. Ons hou van die Vita Bauhaus-deken in twee kleure, Granite Iron en Nugget Gold (bo, heel links; R695). Hulle hou relatief min voorraad aan, wat eksklusiwiteit in jou dekor verseker. Sien meer by blockbasics.co.za.
MODERNE ERFSTUKKE
The Travelling Willow is ’n reeks keramiekware met pragtig geïllustreerde tonele uit stede soos Kaapstad, New York, Tokio, Sydney en Amsterdam deur die kunstenaar Sarah-Jane Jordaan. Die handgemaakte borde, vervaardig in samewerking met Mervyn Gers Ceramics, is te kry in stelle van vier eetborde en vier kleinbordjies (R2 380), of een-een (vanaf R250 stuk). Klante kan ontwerpe meng en só ’n besonderse stel opmaak. Bestel by riseandshineworks.co.za.