Dagboek April-hoogtepunte
OP DIE KASSIE
Aansit (seisoen 1 begin 17 April op VIA, DStv-kanaal 147) is ’n splinternuwe kosprogram waarin passievolle huiskokke hul huis in ’n opskiet-eetplek moet verander en disse van restaurantgehalte optower vir die aanbieder en hoofbeoordelaar, Reuben Riffel, en ’n gasbeoordelaar. En wat ’n prys wen hulle nie! Die wenner kry ’n kosliefhebber se droomvakansie in Frankryk, met ’n besoek aan die Michelinster-restaurant JAN.
DECOREX KAAPSTAD
30 April–3 Mei: Kaapstadse Internasionale Konferensiesentrum (KIKS)
Besoekers aan Decorex Kaapstad sal vanjaar se tema, “Lifestyle by Design”, duidelik sien in die groot verskeidenheid nuwe uitstallings wat die jongste trends uitbeeld. Kom kyk wat Decorex se kreatiewe direkteur, Anita Bloom, as die top-10 tendense beskou by die 2020 Trends Installation, en luister wat voorste vervaardigers, ontwerpers en dekorkenners te sê het by die Instudio Trend Theatre. Sien die volledige lys van al die opwindende uitstallings waarna jy kan uitsien by decorex.co.za. Kaartjies kos R110 vir volwassenes, R100 vir studente en pensioentrekkers, en R20 vir kinders onder 12. Skakel 011 549 8300 vir besonderhede.
KIES TIERLANTYNKIES KUIER-EN-KOOPFEES 30 April–5 Mei: Zwavelpoort, Pretoria-Oos
Bring die hele gesin vir ’n fees van kreatiwiteit by KIES Tierlantynkies. Meer as 90 uitstallers is vanjaar op die skou te sien met ’n verskeidenheid handgemaakte mooigoed en heerlike eetgoed. Teug aan ’n glas wyn en geniet ’n optrede deur plaaslike musikante terwyl die kleingoed baljaar. Kaartjies kos R35 en kinders onder 18 gaan gratis in. Koop joune by tierlantynkies.co.za.
DIE JOHANNESBURGSE CAP CLASSIQUE & CHAMPAGNE-FEES 4–5 April: Inanda-poloklub, Johannesburg
Besoekers by die Johannesburgse Cap Classique & Champagne-fees, geborg deur Sanlam Private Wealth, sal weereens Suid-Afrika se voorste MCC’s, ’n keur van Frankryk se beste sjampanjes en vernaamste Italiaanse prosecco-handelsmerke kan ervaar. Tooi jou in blou en wit – dalk slaan jy ’n prys los! Verskeie kosstalletjies sal die hongerpyne stil en lewende musiek sal die ontspanne atmosfeer van die dag inkleur. Kry kaartjies teen R395 by webtickets.co.za. Skakel
084 207 3820 vir inligting.