Dekordilemma
Die probleem
Ronel Grundlingh van Centurion skryf Ons het ’n groot slaapkamer met ’n sitgedeelte, instapkas en en suite-badkamer. Ek wil die ruimte ’n meer intieme en romantiese atmosfeer gee omdat dit op die oomblik ’n bietjie futloos voel. Ek hou van die plaasstyl, maar ek het g’n idee waar om te begin nie. Help asseblief!
Die oplossing
Micke de Villiers van ons aanlyn-ontwerpdiens Welkom Tuis
(welcomehome.co.za) antwoord Jou slaapkamer is lekker groot, maar die afmetings is taamlik beperkend wanneer dit by uitleg kom. Hier is ’n paar maniere waarop jy die ruimte beter kan benut en ’n meer intieme plaasstyl kan skep.
DIE SLAAPKAMER
Los die bed waar dit is, maar oorweeg dit om die deure daaragter te vervang met mooi plakpapier. ’n Kopstuk met diep knoopdetail, weelderige beddegoed in sagte skakerings en ’n deken sal lieflike tekstuur inbring. Laat ook die ottoman aan die bed se voetenent stoffeer met diep knoopdetail wat by die kopstuk pas. Hou jou bedkassies en hang nuwe spieëls daarbo; elegante bedlampies sal die prentjie voltooi.
Vir die mure sou ek Dulux Dusted Moss 3 aanbeveel om die kamer op te helder; oorweeg dit ook om jou vintage-spieëltafel te skuur en wit te verf – oorweeg Dulux Song Porcelain. ’n Trollie sal jou haartoestelle en -bykomstighede netjies weggebêre hou.
DIE SITGEDEELTE
Skep ’n knus sithoek in die oorkantse deel van die kamer. Skuif die TV na die muur links en belê in ’n moderne TV-kas. Jou rusbank is nog in ’n goeie toestand, so jy kan dit net nuwe lewe gee met ’n los oortreksel in ’n neutrale kleur; twee ekstra stoele sal nog sitplek verskaf. Gebruik dekoratiewe elemente soos strooikussings en dekens om die ruimte te versag.
Omskep die agterste muur in ’n fokuspunt met ’n kompakte koffiestasie, rakke vir pakplek en ’n mini-kroegyskas. Houtrakke sal tekstuur inbring en staanplek bied vir mooi uitstalgoed. Vervang jou kandelaber met ’n meer organiese weergawe om by die geheel te pas, en bring die natuur in met plante en groenigheid.