Spabehandeling
Ansa Pieterse van Pretoria skryf Ek wil graag my troeteldier met ’n massering en mooimaak tuis bederf. Enige wenke?
Sr. Valdette Müller, die eienaar van shingavet.co.za, antwoord
Versorging is ’n wonderlike manier om jou liefde aan jou troeteldiere te bewys en dis ook ’n kans om jul band te versterk. Hier is my raad:
Spring weg Kry al twee van julle se harte aan die klop met ’n balspeletjie of ’n vinnige stappie langs sy gunsteling-voetslaanpad.
Massering Laat jou hond staan en masseer hom van sy kop af ondertoe; gebruik klein sirkelbewegings en trek liggies sy vel en spiere weg van sy kop af. Laat hom sit of lê en masseer sy skouers. Gebruik jou vingertoppe om die spiere in sagte sirkelbewegings te masseer. Honde se skouers dra baie van hul gewig en moet heelwat spanning verduur.
Pedikuur Wanneer jy klaar is met die massering kan jy jou hondekind ’n pedikuur gee. Knip sy naels, maar pasop dat jy nie tot in die lewe knip dat dit bloei nie.
’n Warm bad Maak seker die bad is gereed terwyl jy besig is met die pedikuur. ’n Sjampoe met ’n lekker soet geur sal sy vel opknap en sy pels versterk. As hy woelig is, plak ’n voerder met grondboontjiebotter teen die bad se rand om hom besig te hou.
Droog af en borsel Druk hom droog met ’n handdoek en borsel hom van kop tot stert. Dit help om die haarsakkies te stimuleer en die pels se natuurlike olies te versprei. Eindig af met ’n bietjie honde-lyfsproei.
Bederftyd Beloon hom agterna met sy gunsteling-snoepgoed of -speelding.
KONTAK shingavet.co.za