Vars idees met ’n spatsel kleur

’n Enkele kleur kan van enige ruimte ’n wenner maak.

Trippe, trappe, trone

In ’n andersins neutrale deel van Stefan Blom en Albie du Toit se huis in Groenpunt, Kaapstad, maak ’n stel trappe in ’n waaghalsige skakering van groen ’n groot impak. Hulle het die trap geverf ná hul heel eerste besoek aan Amsterdam. “Dit herinner ons aan die vars kleure van die stad, die welige grasvelde in Nederland – selfs die binnekant van ’n blom!” vertel Stefan.

Handewerk

Annamarie en Dirk Blom het dié oulike muurkuns op die stoep van hul huis op Bettysbaai geskep sodat almal wat vakansies hier kom kuier, heeljaar in hul gedagtes en by hulle is. Die muur is geverf in Dulux Weatherguard, en hul eie hand-afdrukke is saam met dié van hul vier seuns, dié se wederhelftes en hul ses kleinkinders met wit verf teen die muur aangebring.

“Voor die verwoestende brande in 2019 op Bettysbaai het die groen die bome en bossies in die omgewing aangevul; nou herinner dit ons aan hoe kosbaar die natuur is,” vertel Annamarie.

Goue (m)uur

Fred en Cassandra Cockrell het nog altyd die kuns van Frida Kahlo bewonder, daarom het hulle hul wegbreekplek op Langebaan “Casa Kahlo” gedoop. ’n Vrolike geel muur by hul braaiplek digby die kombuis skep lieflike kontras met die kombuis se grys kassies. “Ons wou graag die opgewektheid van die Mexikaanse styl oordra,” vertel Cassandra. “Ons kuier heerlik in dié vertrek: maak potjiekos, bak brood en kook op die stofie wat die huis snoesig verhit in die winter. Op die eiland berei ons kos en mengeldrankies!”

Die bamboes-dranktrollie kom uit Cassandra se ouerhuis en pas perfek by die Mexikaanse tema. Glasbottels in verskillende kleure wat sy oor die jare bymekaargemaak het, verleen ’n tikkie glans op ’n smal uitstalrak voor die kombuisvenster.

Sy ou laaie

’n Pasgemaakte tafel deur die kunstenaar Gabrielle Raaff se pa doen diens as haar kantoortafel; dit pas knus in die hoek van die oopplan-siten-eetkamer in haar huis in Lakeside. Van hier het sy ’n lieflike uitsig op die tuin en haar ateljee. “My pa het altyd dryfhout opgetel wanneer hy op Kommetjie se strand gaan stap het. Hy sou dan ure in sy werkwinkel deurbring en meubels maak,” onthou sy. Die oorspronklike kleure van die dryfhout skep interessante detail en tekstuur op die laaie. “Vir my sit die tafel se skoonheid in sy tapse pote, smal afmetings en, natuurlik, dat dit soveel persoonlike betekenis het.”

’n Oulike hanglamp ontwerp deur Porky Hefer, wat Gabby jare gelede by Design Indaba gekoop het, gee die ruimte ’n speelse gevoel. Kunswerk getiteld Thrown II deur Gabrielle Raaff