Die opknap
Cara se bouer en projekbestuurder, Paul Stein, was van Februarie tot einde Maart besig. “Ek wou hê hy moet die ruimte ‘leefbaar’ maak,” sê Cara.
Sy het op 1 April ingetrek en toe met vriende se hulp van die kleiner takies self gedoen. “In dié stadium was my begroting so te sê uitgeput en het ek besluit om sonder kombuiskaste klaar te kom (dit was wel daar teen die tyd dat die Tuis-span kom foto’s neem het) en die bestaande sementvloer net so te hou.
“Ek het ure op Pinterest en die huisontwerp-app Houzz deurgebring. Ek dink graag allerhande selfdoenplanne uit en koop die materiaal, maar my grootste uitdaging is om die planne uit te voer. Ek het nie altyd die regte gereedskap gehad nie, en vir die moeiliker werk het ek my vriende Terence Shone en Rob Nel se hulp ingeroep – ek het hulle omgekoop met aandete! Maar mettertyd het ek heel bedrewe geraak en nou is ek dol oor my boor.
“Ek is altyd besig om nuwe projekte uit te dink. Bo-aan my wenslysie is om die eenheid langsaan te koop en deur te breek. Ek het al klaar die uitleg in my kop ...”