Viniel vir my vloer
Henriette Thompson van Middelburg skryf Nadat ons geiser in die dakruimte bo ons gang gebars het, het ons besluit om sommer die matte in die gang en slaapkamers te vervang. Wat is ons opsies as ons ’n vinielvloer wil hê (ek verkies ’n houtvoorkoms) en wat behels die installering? My man is ’n kranige selfdoener; kan hy so ’n vloer self lê of moet ons dit laat doen?
Sasha Kozinsky, besturende direkteur by
Finfloor SA, antwoord Finfloor vervaardig rigiede vinielteëls met ’n samestelling van klip en plastiek; dis duursaam en geskik vir ons strawwe klimaat. Ons Diamond Core-reeks is te kry in ’n verskeidenheid ontwerpe met ’n houtvoorkoms, en daar is ’n kleur vir elke styl.
Installering is redelik maklik, aangesien die stroke aan al vier kante inmekaarklik. Die uiters stabiele aard van die vinielteëls en besonder sterk voeë beteken jy kan dit oor die meeste harde oppervlakke, insluitend teëls, lê. Maak net seker die ondervloer (die basis vir die vloerbedekking) is gelyk en daar is geen klammigheid nie.
Die vinielteëls het ’n IPXE-skuimrugkant, daarom is ’n onderlaag nie nodig nie. Die rugkant is ook ’n vog- en klankversperring.
Hoewel jy die vloer self kan insit, beveel ons aan dat jy ’n installeerder gebruik wat by SAWLFA (South African Wood and Laminate Flooring Association) geakkrediteer is; hulle sal verseker die installering voldoen aan die vervaardiger se spesifikasies sodat jy nie jou waarborg verbeur nie.
Die vloere is maklik om skoon te maak en te onderhou: daagliks hoef jy net te vee om stof te verwyder en die kans vir krapmerke te verlaag; een keer ’n week kan jy die vloer met ’n klam lap of mop afvee. Volg dié wenke om jou vloer te beskerm: • Gebruik deurmatjies om te keer dat daar te veel sanderigheid ingetrap word. • Sit viltskyfies onder meubels se pote. • Hou die vloere skoon. • Moenie meubels oor die vloer sleep nie.
KONTAK finfloor.co.za >>