VLA SKYWE MET GRENADELLA VERSIERSEL

Appel-endadelhappies

Propvol energie en blitsvinnig om te maak. Vervang die neute met jou gunstelingsade en speel met jou eie droëvrugtekombinasie as jy nie al die bestanddele in jou spens het nie. Genoeg vir sowat 36 blokkies Bereidingstyd: 10 minute

• 250g ontpitte dadels • sowat 60ml kookwater • sowat 125ml gekapte kasjoeneute • sowat 125ml gekapte amandels • knippie kaneel • 20g (60ml) klapper, gerooster • ’n klein hand vol gedroogde appelstukkies, gekap • ekstra klapper Sit die dadels en kookwater in ’n voedselverwerker en pols saam. Voeg die neute by en pols verder totdat ’n growwe pasta vorm. Keer dit uit in ’n mengbak en roer die kaneel, klapper en appel by. Meng totdat die “deeg” saamkom – indien die tekstuur te slap is na jou sin, voeg ekstra droë bestanddele by tot net reg. Druk nou die mengsel in ’n eweredige laag in ’n vierkantige bak van sowat 20 x 20 cm en sit dit in die yskas (as jy haastig is, in die vrieskas) tot styf. Keer uit, sny in blokkies en rol in die ekstra klapper. Bêre in ’n lugdigte houer op ’n koel plek.

Vlaskywe met grenadellaversiersel

Die Tennisbeskuitjies se ekstra klappergeur is heerlik saam met die grenadellaversiersel, maar vervang dit gerus met Cream Crackers vir ’n meer tradisionele skyf. Genoeg vir 9 blokke Bereidingstyd: 30 minute Gaarmaaktyd: sowat 10 minute

• 27 Tennisbeskuitjies VLA • 1 liter melk • 5ml vanieljegeursel • 70g (120ml) vlapoeier • 100g (125ml) strooisuiker • 8 eiergele (hou die witte eenkant) VERSIERSEL • 30ml grenadellapulp • 15ml gesmelte botter • 130g (250ml) versiersuiker

1 Voer ’n vierkantige bak waarin 9 Tennisbeskuitjies knus pas met bakpapier uit (dit help met die uitkeerslag). Pak 9 van die beskuitjies in ’n vierkant onderin die bak.

2 Maak die vla Verhit die melk in ’n klein kastrol tot net onder kookpunt. Klits die res van die vulselbestanddele saam tot glad. Giet die melk geleidelik by die vlamengsel terwyl jy aanhoudend klits om te keer dat klonte vorm. Skep alles terug in die kastrol en klits verder oor matige hitte tot die vla dik en gaar is.

3 Giet die helfte van die vla oor die eerste laag beskuitjies en pak nog ’n laag beskuitjies bo-op. Giet nou versigtig die res van die vla oor en bedek met die laaste laag beskuitjies. Laat die tert heeltemal afkoel voor jy dit in die yskas laat stol.

4 Om voor te sit Klits die grenadellapulp, botter en versiersuiker saam tot glad. Sny die tert in nege blokke en giet die versiersel oor. Sit voor met meringuesoentjies (resep onder).

Meringuesoentjies

Klits 8 eierwitte saam met ’n knippie kremetart en ’n knippie sout tot sagte punte vorm (gebruik die eierwitte van die vlatertresep). Voeg nou sowat 500 g

(625 ml) strooisuiker lepel vir lepel by terwyl jy klits – sodoende los al die suiker op en word die meringuemengsel glansend en styf. Skep of spuit met ’n spuitsak klein soentjies op bakplate wat met bakpapier uitgevoer is. Droog dit vir sowat 1 uur uit teen 100 °C en laat in die oond afkoel as jy genoeg plek het. Die happies hou sowat ’n week in ’n lugdigte houer. Strooi ’n lagie strooisuiker onderin die bak – dit help keer dat die meringues pap word.