VARKSOSATIES MET ’N TAAI PRUIMSOUS
Maak 8 sosaties • Bereidingstyd: 30 minute Gaarmaaktyd: sowat 15 minute
• 500ml kookwater • 250ml klappermelk • 250ml jasmynrys • 800g varkboud, in 2cmblokke gesny • ½ rooi ui, in blokkies gesny
• 1 groot rooi soetrissie, saad verwyder en in blokkies gesny • 16 lourierblare • 15 ml olyfolie • 60 ml pruimsous • lemmetjiewiggies vir voorsit
1 Bring die water en klappermelk tot kookpunt en geur met sout. Roer die rys by, bedek en laat prut oor matige hitte tot die rys gaar is en al die vloeistof geabsorbeer het. Verwyder van die hitte en laat staan vir sowat 5 minute.
2 Ryg die vark, uie, soetrissies en lourierblare op sosatiestokkies. Braai aan alle kante in die olyfolie. Verf met die pruimsous en giet ’n skeut water in die pan. Bedek en laat kook vir ’n paar minute voor jy die deksel afhaal en die sous laat inkook tot taai. Sit voor met die klapperrys en lemmetjiewiggies.