’n Tikkie Franse flair
Serina weet net hoe om aan ’n splinternuwe huis ’n lieflik ingeleefde gevoel te gee met vintage- en antieke meubels. Maar moenie glo haar huis is ’n replika van haar winkel nie. Waar sy in die winkel spesialiseer in nerf-af meubels, is haar eie styl eerder “vars vintage” gekombineer met ’n tikkie Franse flair. As ’n nooi De Villiers loop daar immers ’n stewige dosis Franse bloed deur haar are! Sy kies om dié erfenis subtiel in haar dekor in te bring.
“Die meeste meubels kom uit my vorige huis, maar ek het tog die afgelope twee jaar ’n paar stukke spesifiek bymekaargemaak vir ons nuwe huis – veral groot Franse hangkaste, omdat ek geen ingeboude kaste in die huis wou hê nie,” vertel sy. Heelwat van dié kaste is afkomstig van Strand Trading Post en het perfek in die huis met sy hoë plafonne gepas. “Die ding van Franse kaste is dat jy nogal heelwat spasie daarvoor nodig het,” verduidelik Serina. “Met dié styl moet meubels mekaar aanvul en nie met mekaar meeding nie – die balans moet reg wees.