Tong
Genoeg vir 8 • Bereidingstyd: 10 minute • Gaarmaaktyd: 3–4 uur
• 1 vars of gepekelde tong van sowat 1,5kg • 1 groot ui, geskil en grofgekap • 2 knoffelhuisies • 2 lourierblare • 2 heel naeltjies
1 Spoel die tong deeglik af en sit dit in ’n groot genoeg kastrol. Voeg al die ander bestanddele by en bedek die tong met water. Verhit tot kookpunt. Verlaag dan die hitte en laat prut vir sowat 2–3 uur met die deksel op totdat die tong gaar en sag is as jy dit met die punt van ’n skerp mes toets. Voeg in die proses nog water by indien nodig; dis belangrik dat die tong met water bedek bly terwyl dit kook.
2 Lig die tong uit die kookvloeistof en laat afkoel tot hanteerbaar. Gebruik ’n skerp messie en verwyder die vel versigtig (doen dit terwyl die tong nog warm is, dan is dit baie makliker). Sit die tong nou in ’n bak en bedek weer met kookvloeistof sodat dit stadig kan afkoel voor jy dit sny; sit voor met mosterd en melbaroosterbrood.
[ MAKLIKE MIKROGOLFMOSTERD]
Meng 30 g (80 ml) mosterdpoeier, 160 g (200 ml) suiker, 10 g (20 ml) meel, ’n knippie sout en 4 eiers. Klits nou geleidelik 250 ml appel-asyn by en mikrogolf saam vir 8 minute. Roer elke 2 minute met ’n ballonklitser deur. Geur met 15 ml bereide korrelmosterd en swartpeper. Skep in ’n gesteriliseerde glaspotjie en laat afkoel.
[ MELBAROOSTERBROODSTERRE]
Gebruik stervormige koekiedrukkers van verskillende groottes en druk sterre uit winkelwitbrood. Rol die sterre plat met ’n koekroller en versprei dit op bakplate. Droog uit in die oond teen 200 °C tot bros.