Waterwys plant van die maand

Roosmaryn

Roosmaryn (Rosmarinus officinalis) is ’n waterwys Mediterreense krui met aromatiese grysgroen naaldagtige loof en wit, bleek of donkerblou blomme. Die blare word spaarsaam gebruik vir geur in pluimvee- en vleisgeregte. Jy kan takkies tussen jou klere sit om motte weg te hou of vir geur in jou water wanneer jy bad of hare was.

Regop groeiende roosmaryn is uitstekend vir potte, in ’n kruietuin en in die groentetuin as ’n metgesel vir boontjies, wortels en kool. Dit kan ook as vormplant of gesnoeide heining gebruik word. Kruipende roosmaryn is ’n uitstekende spreidende grondbedekker of fokusplant wat oor opgeboude beddingrande tuimel.

Kweek roosmaryn altyd in volson en goed gedreineerde grond. Knyp terug om ’n bosagtige groeiwyse te behou en snoei nadat dit geblom het, sonder om in die ou hout terug te sny.