Ander gunstelinge
“Ek verkies plante wat vir jare hou, want tuinmaak is ’n duur storie. Baie van my gunstelinge is plante wat met verloop van tyd net mooier word, of wat self vermeerder of waarvan jy steggies kan maak,” gesels Adele. • Baardirisse (Iris-spesies) blom vroeg in die lente. Hul blaarvorm en kombinasie van kleure is ongelooflik. • Laventel, veral Lavandula x intermedia var. ‘Margaret Roberts’. • Salies (Salvia-spp.), veral pers en blou salies. Hulle lyk baie mooi saam met rose. • Kamelias en asaleas vir blomme in die winter en vroeë lente. • Zantedeschia aethiopica ‘Green Goddess’. “Ek kweek dit in die skaduwee saam met my krismisrose. Dié aronskelk lyk ook mooi in ’n pot en blom vir weke aaneen.” • Sterjasmyn (Trachelospermum jasminoides) wat so lekker ruik in die klipbokse langs die trappe. • Bloureën (Wisteria sinensis) vir sy heerlike geur. • Haar gunstelingboom is prag-van-Indië
(Lagerstroemia indica). “Dis mooi in al vier seisoene. In die somer het dit pragtige pienk of pers blomme en in die herfs verkleur die blare roesrooi. Wintertyd is die kaal stamme pragtig en ek is dol oor die nuwe blaartjies in die lente.”