[ALGEMENE TUINWENKE]
• Loop gereeld deur jou tuin. Só sien jy watter plante kort aandag en waar gee jy te veel of te min water. Ek en Satiyere stap graag saam en kyk wat gedoen moet word. • Grondvoorbereiding is die belangrikste deel van tuinmaak. As jy met jou grond moeite doen, sal jou plante jou met goeie groei en baie blomme beloon. In Augustus gee ons die hele tuin ’n dik laag kompos. • Ek los al die blare wat van die akkerbome afval in die beddings. Dit vorm ’n natuurlike deklaag en verrot met verloop van tyd. • Wees op die uitkyk vir peste en plae; hulle kan baie vinnig groot skade aanrig. Doen dadelik iets daaraan. Maak ook seker die plante wat jy by ’n kwekery koop, is gesond. • Gee plante minder kere per week water, maar vir langer tye op ’n keer. Jy wil hê die water moet tot by die wortels kom. Wanneer dit in die somer hier by ons reën, gee ek glad nie water nie. Ná ’n goeie reënbui sit ek die spuite vir tot vyf dae af. Ek voel ook met my hand of die grond klam is. Of koop ’n vogmeter wat vir jou wys of die grond droog is. Om onnodig water te gee, is net ’n vermorsing.