Oortjies
Oortjies is ’n geharde, matvormende grondbedekker met ’n plat groeiwyse. Dit het pragtige ronde blaartjies en spog van September tot Desember met groot ligpienk tot wit trompetvormige blomme. Dié inheemse grondbedekker groei in die son sowel as gedeeltelike skaduwee, en hoewel dit in taamlike nat dele goed sal groei, is dit ook gelukkig met minder water sodra dit goed gevestig is.
Oortjies is ’n goeie opsie tussen plaveiblokke en lyk mooi al met die rand van ’n bedding langs. Dit sal ’n oop stuk grond vinnig toegroei en kan as ’n alternatief vir gras gebruik word waar daar nie veel voetverkeer is nie. Of plant dié vinnige groeier in ’n pot – dit lyk pragtig as die blomme oor die rand van die pot hang.