Gouevygie

(Lampranthus aureus) Helia

’n Vroliker grondbedekker as dié vygie sal jy moeilik kry! Met sy helderkleurige oranje of geel blomme sal dit enige waterwys tuin ophelder. Dis ’n vinnige groeier en sal gou ’n kaal stuk grond bedek. Die plant kom natuurlik voor in die Wes-Kaap, al met die Suidwes- en Weskus langs. Dit groei veral goed in winterreëngebiede met warm, droë somers.

Danksy sy vetplantagtige blare kan dit in droë tye met baie min water oorleef. Gouevygie aard goed in sanderige tot leemgrond en het baie son nodig. Die blommetjies maak oop wanneer die son skyn en dit blom op sy mooiste in Augustus en September.