Lepelblaarplakkie
(Crassula spathulata) Wouter en Neville
Dié immergroen, vetplantagtige grondbedekker is uiters gehard, groei vinnig en is maklik om te kweek. Met sy amper lemmetjiegroen ronde blaartjies en fyn pienk-en-wit blommetjies maak dit ’n pragtige vertoning in die skaduwee. Dit blom in die lente en somer en word in blomtyd gereeld deur ewe klein bestuiwers besoek. Die plakkie lyk mooi as ’n massa-aanplanting onder bome, al met ’n beddingrand langs of in potte en hangmandjies waar dit oor die rand kan tuimel.
Crassula spathulata is ook nuttig om teen hellings te plant om die grond te stabiliseer. Dit aard in feitlik enige tipe grond, solank die dreinering goed is. Hoewel dit ’n vetplant is en min water nodig het, sal dit ook in ’n tuin met normale besproeiing floreer. Dit groei maklik van steggies en saad.