Dwergspekboom
(Portulacaria afra ‘Prostrata’) Anja
Dié inheemse vetplant is ’n geharde, laaggroeiende lid van die spekboomfamilie. Waar die alombekende spekboom regop groei, het dié familielid ’n kruipende groeiwyse wat dit so ’n goeie grondbedekker maak. Plant dit in goed gedreineerde grond in die son of skaduwee. Dit floreer in arm grond en droë toestande en is dus ideaal vir ’n waterwys tuin. Wag tot die grond uitdroog voor jy weer natmaak.
Spekboom groei ook maklik van steggies – breek net ’n takkie af en druk dit in die grond. Met sy klein, vetplantagtige blare op geboë rooibruin stele is dit ook geskik vir ’n pot, ’n hangmandjie of om keerwalle toe te groei. Dit aard goed in seetuine en is windbestand.
Om lewende grondbedekkers te plant is soos om ’n tapyt in jou tuin te skep. – Anja