Rotstuinsalie
(Plectranthus neochilus) Wouter
Hoe minder water, hoe mooier blom die rotstuinsalie! As dit te veel water kry, groei dit te geil en hoog. Dié inheemse grondbedekker aard in warm, sonnige en droë tuine, sowel as in die skaduwee. Dit aard in enige tipe grond, maar verkies sanderige grond met goeie dreinering. Rotstuinsalie groei vinnig en is baie maklik om te vermeerder met steggies – druk net ’n takkie in die grond. Selfs ’n stukkie wat op die grond beland, sal vinnig wortelskiet en groei. Vernuwe die bedding so elke twee jaar as dit begin slordig lyk. Plant eenvoudig steggies van die bestaande grondbedekker tussenin en trek met verloop van tyd die ouer plante uit.
Rotstuinsalie blom oorvloedig en aanmekaar van September tot April. Die blomme groei bo die grysgroen blare uit; laasgenoemde het ’n sterk reuk as jy dit vryf of kneus.