Sterjasmyn

(Trachelospermum jasminoides) Helia

Hoewel sterjasmyn dikwels as ’n rankplant gebruik word, maak dit ook ’n wonderlike grondbedekking. Dis veral in die laatlente en vroegsomer oortrek van wit stervormige blommetjies wat heerlik ruik. En al blom dit nie, is die blink donkergroen blare steeds mooi.

Wanneer jy dit as ’n grondbedekker wil inspan, hoef jy nie die gewoonlik duurder plante wat reeds hoog groei, te koop nie; ’n kleiner een sal perfek werk. Spasieer sterjasmynplante sowat 40 cm uitmekaar in goed voorbereide, komposryke grond. Sny die lang lote gereeld terug om die plant aan te moedig om ’n digte grondbedekking te vorm, maar moet dit nie kort voor blomtyd doen nie. Die plant kan ook ná blomtyd bolangs goed teruggesnoei en gelyk gesny word. Sodra die plant gevestig is, het dit minder water nodig.