Binneruim
Die eerste geslag Chinese bakkies wat hier aangeland het, het slae gekry oor die swak gehalte materiale en afwerking van die kajuite.
Die Foton is die eerste in hierdie groep om dié probleem gedeeltelik reg te stel, want die uitleg van sy instrumentepaneel, met maklik leesbare instrumente en ritrekenaar (behalwe in skerp lig), is eenvoudig en ergonomies uitgelê, sy leersitplekke gerieflik (ook agter) en sy kajuit lekker ruim.
Hoewel sy plastiekpanele hard is, is dit nou van beter gehalte, en dit geld ook vir die materiale en gehalte wat vir die res van die binneruim gebruik is. Die topmodel-4x4 Luxury se toerustinglys is omvattend en sluit in lugversorging, elektriese vensters, goeie radio/CD-speler, voorste lugsakke, asook stuurwiel-beheerfunksies en Bluetooth-aanpasbaarheid. (Ons toetsmodel, met ouer spesifikasievlak, het egter nie hierdie bykomstighede gehad nie.)
Hoewel die GWM se uitleg binne verouderd is, is die afwerking en gehalte soortgelyk aan dié van die Tunland. Maar wat ruimte betref, voel dit beknop, met min skouerruimte voor en nie veel beenruimte vir die agterste passasiers nie.
Die Vigus met sy SLX-afwerkingsvlak verras jou binne. Sy instrumentepaneel is netjies en modern uitgelê met ’n groot 6,5 duim-raakskerm in die middel, sy leersitplekke is gemaklik en die kajuit voel ruim, maar knus.
Dis duidelik dat die Fordverbintenis gehelp het om die binneafwerking en -gehalte van dié nuweling ’n trappie hoër te lig, en in dié opsig staan hy g’n tree terug vir baie duurder bakkies nie.
Hoewel Tata probeer het om die Xenon se kajuituitleg te vernuwe, grens die afwerking daarvan steeds aan skokkend.
Dit het nou ’n handige naverkoop-vertoonpaneel (met satellietnavigasie), maar nie eens die deurpanele pas sekuur nie, en sy goedkoop, harde materiale en swak bougehalte gee ’ n gevoel van afskeepwerk.