STRIKDAS, VELSKOENE EN ’N GROOT REISTAS
Die nuwe X-TRAIL bou goed voort op sy tradisie van goeie teer- en grondpadvermoë met slim pakruimte. En die nuwe een is boonop baie netjies ook, binne en buite.
Nissan se fokus met die X-Trail was nog altyd funksionaliteit, slim pakplek en binneruimuitleg. ’n Hardebaard-4x4 was hy nog nooit, maar met goeie grondvryhoogte en vierwielaandrywing kon eienaars heelwat grondpad pak. Met al daai pakplek (selfs die voorste passasiersitplek kan platslaan) is dit eintlik vreemd Avbob het hom nog nooit gebruik nie.
Waar’s die broodblik?
Die hoekige ontwerp is nou weg – dié voertuig het byna meer kurwes as ’n agterbladmodel. Van voor af lyk hy soos ’n Juke op ’n groot TV-skerm, maar van die kant af darem soos ’n nutsvoertuig, met hoë wielboë en goeie grondvryhoogte.
Die nuwe model is net 5mm langer as die vorige een, maar sy asafstand is 75mm langer en hy’s 30mm breër, wat jou 20% meer ruimte aan die binnekant gee. Hoeveel presies 20% is, is moeilik om te sê, maar omdat jy die voorste passasiersitplek ook kan platslaan, het jy 2,6m spasie van agter tot voor om daai doodskis, oukei, kajak, te laai.
Die grondvryhoogte is ook 6mm hoër – 209mm – en die nuwe modelle is 90 kg ligter.
Rygoed en blygoed
Die nuwe X-Trails kry ’n 2,0 en 2,5 liter-petrolenjin asook ’n 1,6 liter-dieselenjin, wat die 2 liter-diesel vervang. Hy’t dieselfde wringkrag as die ou twee- liter, maar is meer ekonomies, met laer emissies.
Die 2,5-liter model kry ’ n CVT-ratkas en Nissan sê die geluide wat die vorige CVT-ratkas teen hoë toere gemaak het, is nou weg. Ons het hom egter net teen lae toere in 4x4 op ’n hindernisbaan gery.
Die dieselenjin vat ’n ruk om aan gewoond te raak. Ek én my medebestuurder het aanvanklik die voertuig kort-kort laat vrek met die wegtrek. Hy soek ’ n bietjie gas as jy wegspring. Die enjin is taamlik futloos onder 2000r/min., maar sodra die toere klim, spring hy weg met selfs meer skop as die 2 literpetrol. Die klein petrolenjin steek egter nie af teen sy broers nie, en het goeie krag vir sy grootte.
Ek was beïndruk met die grondpadrygerief van al die modelle, selfs op slegte sink-plaatpad. Drie uit die vyf (2.5 SE, 1.6dCi SE en 1.6dCi LE) kom met Nissan se All-Mode 4x4istelsel uit, en hy’t goed gewerk op die hindernisbaan, in Auto en 4WD Lock.
Binne kry jy die gevoel van ’n luuksevoertuig en al drie enjins het ’n sewesitplek-opsie. Nissan sê dis die enigste sewesitplek in hierdie marksegment.
Wat egter meer beïndruk, is dat die nuwe intreeprys minder as die huidige intreemodel s’n is. Die waarborg is ook gerek na 6 jaar/150000km, en die diensplan na 5 jaar/90000km, met padbystand. Dis waarskynlik dié voertuig se X-faktor.